Pisalema 36 - BIBELE Mahungu Lamanene

Munhu ú hombolokile, kambe Xikwembu xona xi lulamile

Risimu ra Muyimbelerisi. Pisalema ya Davhida nandza wa HOSI.

¹ Marito layo biha ya munhu wo homboloka a ma suki embilwini ya mina: Hi ku vona ka yena, a swi pfuni nchumu ku chava Xikwembu.

² Ú tivona a lulamile ngopfu, kutani loko swidyoho swa yena swi tshuka swi paluxiwa, a nga swi vengi.

³ Leswi a swi vulavulaka i mavunwa ni ku kanganyisa ntsena; ku tiva ni ku endla leswinene, ú swi tshikile khale.

⁴ Hambi a etlele nivusiku, ú le ku lukeni ka mano layo biha, a hlawula ndlela leyi nga riki yona, a nga fularheli leswo biha.

⁵ We HOSI, rirhandzu ra wena ri fika ni le matilweni, ku tshembeka ka wena ku tlakukile ku fika emapapeni.

⁶ Ku lulama ka wena ku fana ni tintshava letikulu, ku avanyisa ka wena ku entile kukota swidziva swa lwandle, we HOSI, u hlayisa vanhu ni swiharhi.

⁷ We Xikwembu, rirhandzu ra wena lero tshembeka ri tsakisa ngopfu, vanhu hinkwavo va tumbela ehansi ka timpapa ta wena.

⁸ Va hanya endzalweni ya leswi u va phamelaka swona; u va nwisa ni mati layo nandziha enambyeni wa wena,

⁹ hikuva hi wena u nga xihlovo lexi xi hi nyikaka vutomi, kutani hi voningiwa hi ku vonakala ka wena.

¹⁰ We HOSI, u nga tshiki ku komba rirhandzu ra wena lero tshembeka eka lava va ku tivaka, u nga karhali ku lwela vanhu va timbilu leto lulama.

¹¹ U nga pfumeli leswaku lava tikurisaka va nghena emutini wa mina, ni leswaku lavo homboloka va ndzi humesa eka wona.

¹² Languta laha lavo homboloka va weleke kona: Va wisiwile, va nge he pfuki!