Pisalema 35 - BIBELE Mahungu Lamanene

Xikhongelo xo kombela ku lweriwa eka valala

Pisalema ya Davhida.

¹ We HOSI, hlasela lava va ndzi hlaselaka, u lwa ni lava lwaka na mina.

² Teka xitlhangu lexikulu ni lexitsongo, u ta u ta ndzi ponisa.

³ Khoma tlhari ni xihloka, u lwa ni lava va ndzi hlongorisaka! Ndzi tshembise leswaku u ta ndzi lwela.

⁴ Lava ringetaka ku ndzi dlaya, a va nyumisiwe va tsongahatiwa; a va tlherisiwe va khomiwa hi tingana, lava va ndzi tshamaka xikungu.

⁵ A va fane ni mungu lowu hahisiwaka hi moya, ntsumi ya HOSI a yi va hangalase.

⁶ Laha va taka hi kona, a ku ve ni xinyami ku tlhela ku rheta, loko ntsumi ya HOSI yi ri karhi yi va hlongorisa.

⁷ A ndzi va dyohelanga nchumu, kambe va ndzi rhiya hi ntlhamu, va cela khele leswaku ndzi wela ka rona ndzi fa.

⁸ A va humeleriwe hi khombo leri va nga ri langutelangiki, ntlamu lowu va wu rhiyeke, a wu phase vona wu va dlaya!

⁹ Kutani ndzi ta tsaka hikwalaho ka HOSI, ndzi tsakisiwa hi ntirho wa yona wo ponisa.

¹⁰ Ndzi ta vula hi mbilu ya mina hinkwayo, ndzi ku: A ku na la fanaka na wena we HOSI, hikuva u kutsula swisiwana eka lava va swi xanisaka, u lwela vapfumari eka lava va va tekelaka swa vona.

¹¹ Vanhu va mavunwa va yima ehubyeni, va ndzi tengisa ehenhla ka leswi ndzi nga swi tiviki.

¹² Ndzi va endlele leswinene, kambe vona va ndzi endlela leswo biha, va ndzi tumbelela va lava ku ndzi dlaya.

¹³ Loko va vabya, mina a ndzi ambala leswo khwaxa, ndzi titsongahata hi ku titsona swakudya, ndzi va khongelela ndzi vuyelela.

¹⁴ A ndzi ya hala ni hala, ku fana ni loko ndzi tirhela makwerhu kumbe munghana, a ndzi rila ndzi langute hansi, kukota loko ndzi feriwe hi manana.

¹⁵ Kambe loko mina ndzi khuguka ndzi wa, va tsaka ngopfu, va hlengeletana, va ta ku ta lwa na mina; va tiendla vanhu vambe lava ndzi nga va tiviki, va tshamela ku ndzi sandza.

¹⁶ Vanhu lava vo homboloka, va ndzi hlekula wonge ndzo va ni malunda, va ndzi mpfhumpfhela!

¹⁷ We N'wini wanga, u ta hlalela swilo leswi ku fika rini xana? Ndzi ponise emavokweni ya swigevenga leswi, u ndzi kutsula emin'waleni ya tinghala leti,

¹⁸ kutani ndzi ta ku tlangela emahlweni ka nhlengeletano leyikulu, ndzi ta ku dzunisa exikarhi ka mintshungu.

¹⁹ U nga pfumeli leswaku valala va mina va tsakisiwa hi khombo ra mina, hikuva a ndzi va dyohelanga nchumu; lava va ndzi vengaka ntsena, u nga va tshiki va tshunyetana-tshunyetana ha mina.

²⁰ Leswi va swi vulaka a swi rhulisi mbilu, va vulavula ntsena makungu ya ku kanganyisa vanhu lavo rhula etikweni.

²¹ Eku vulavuleni ka vona va ndzi lumbeta ngopfu, va ku: “Hakunene! Hi swi vonile hi ya hina mahlo!”

²² We HOSI, swi voniwile hi wena, u nga tshuki u miyela, u nga vi kule na mina, we N'wini wanga!

²³ We Xikwembu xanga, suka u yima u ndzi vulavulela, u ndzi biyelela emhakeni ya mina, we N'wini wanga.

²⁴ We HOSI, Xikwembu xanga, ndzi lwele, u kombisa leswaku a ndzi na nandzu emahlweni ka wena, u nga pfumeli leswaku valala va mina va titsakisa hi mina.

²⁵ U nga va pfumeleli va tidzunisa va ku: “Aháà! namuntlha hi kumile leswi ku nga khale hi ri karhi hi swi navela!” va nga tshuki va ku: “Hi n'wi kotile!”

²⁶ Lava tsakaka loko ndzi ri ekhombyeni, hinkwavo a va hlanganisiwe tinhloko; a va khomiwe hi tingana va nyumisiwa, vona lava tikurisaka emahlweni ka mina.

²⁷ Kambe lava tsakisiwaka hi ku khana ka mina, a va be nkulungwana va ku: “HOSI Xikwembu xi dzuneka ngopfu, xona xi rhandzeke leswaku nandza wa xona a humelela.”

²⁸ Kutani ndzi ta yimbelela ndzi twarisa ku lulama ka wena, ndzi ta ku tlangela masiku hinkwawo.