Pisalema 34 - BIBELE Mahungu Lamanene

Risimu ro tlangela vunene bya Xikwembu

Pisalema ya Davhida, leyi a yi sumeke endzhaku ka loko a endlile wonge ú ni rihuhe emahlweni ka Abimeleke, kutani a hlongoriwa a famba.

¹ Ndzi ta tlangela HOSI Xikwembu minkarhi hinkwayo, ndzi nga ka ndzi nga tshiki ku xi dzunisa.

² Ndzi ta tidzunisa hi xona, kutani vanhu lava tsongahatiwaka, va ta tsaka loko va ndzi twa.

³ Yimbelelani na mina mi twarisa vukulu bya xona, a hi dzuniseni swin'we vito ra xona.

⁴ Ndzi komberile HOSI Xikwembu leswaku xi ndzi pfuna, kutani xi ndzi hlamurile, xi ndzi ntshunxa eku chaveni ka mina hinkwako.

⁵ Lava langutaka eka xona va ta khapa hi ntsako, va nga ka va nga khomiwi hi tingana ni siku ni rin'we.

⁶ Munhu un'wana loyi a a ri ekhombyeni, ú huwelerile eka HOSI Xikwembu, kutani xi n'wi twa, xi n'wi ponisa emaxangwini ya yena hinkwawo.

⁷ Vanhu lava chavaka HOSI Xikwembu, va sirheleriwa hi ntsumi ya xona, kutani yi va kutsula ekhombyeni.

⁸ Tanani mi ta vona hi n'wexe leswaku HOSI Xikwembu xi ni vunene! Munhu loyi a tumbelaka eka xona, ú katekile ngopfu.

⁹ Chavani HOSI Xikwembu n'wina vahlawuriwa va xona, hikuva lava va xi chavaka, a va pfumali nchumu.

¹⁰ Tinghala ti nga ha pfumala swakudya, ti twa ndlala, kambe lava lavaka HOSI Xikwembu, a va nga pfumali xilo ni xin'we lexo saseka.

¹¹ N'wina vana vanga, tanani mi ta twa, ndzi lava ku mi dyondzisa ku chava HOSI Xikwembu.

¹² Loko mi navela vutomi lebyinene, ni ku kuma minkateko emasikwini ya n'wina ya ku hanya,

¹³ chavani ku vulavula leswo biha, mi nga tshuki mi kanganyisa van'wana hi marito;

¹⁴ tshikani leswo biha mi endla leswinene, lavani ku rhula, mi tiyisela endleleni ya kona,

¹⁵ hikuva HOSI Xikwembu xi hlayisa lavo lulama; loko va ya rila eka xona, xa va yingisa,

¹⁶ kambe xi lwa ni lava endlaka leswo biha, xi va herisa leswaku va nga ha tsundzukiwi laha misaveni.

¹⁷ Loko lavo lulama va kombela ku pfuniwa, HOSI Xikwembu xa va twa, xi va kutsula emaxangwini ya vona hinkwawo.

¹⁸ HOSI Xikwembu xi le kusuhi ni vanhu lava timbilu ta vona ti nga eku vavisekeni, xi ponisa lava mimoya ya vona yi tshovekeke.

¹⁹ Munhu wo lulama u hlangana ni miringo leyo tala, kambe HOSI Xikwembu xi n'wi hlulela yona hinkwayo;

²⁰ xi hlayisa swirho swa yena hinkwaswo, leswaku ku nga tshoveki ni xin'we xa swona.

²¹ Munhu wo homboloka ú dlawa hi vubihi bya yena, ni lava vengaka munhu wo lulama, va ta biwa.

²² HOSI Xikwembu xi ponisa malandza ya xona; eka lava va tumbelaka eka xona, ku hava ni un'we la nga ta biwa.