Pisalema 33 - BIBELE Mahungu Lamanene

Risimu ro dzunisa Muvumbi, Muhlayisi wa hinkwaswo

¹ Yimbelelani mi twarisa HOSI, n'wina lava lulameke, n'wina mi yingisaka HOSI, swa mi fanela ku yi dzunisa!

² Yi tlangeleni hi switende, mi yi tsakisa hi mpfumawulo wa tiharipa ta khume ra tingoti.

³ Yimbelelani risimu lerintshwa, mi vonga HOSI, chayani swi nandziha swinene, swi twanana ni timhalamhala.

⁴ Leswi HOSI Xikwembu xi swi vulaka, swi lulame ngopfu, xi endla hinkwaswo hi ndlela leyi tiyeke.

⁵ Xi tsakela ku lulama ni ku avanyisa lokunene, rirhandzu ra xona lero tshembeka ri tate misava hinkwayo.

⁶ HOSI Xikwembu xi endle matilo hi rito ra xona, xi lo lerisa kunene, kutani dyambu ni n'weti ni tinyeleti, swi va kona hinkwaswo.

⁷ Xi hlengeletile mati ya lwandle ma endla ndhundhuma, swidziva xi swi pfalerile evuhlayiselweni bya swona.

⁸ Misava hinkwayo a yi chave HOSI Xikwembu, vaaki hinkwavo va yona a va rhurhumele emahlweni ka xona,

⁹ hikuva xi vulavurile, kutani swilo swi va kona; xi lo lerisa kunene, kutani swi humelela.

¹⁰ HOSI Xikwembu xi pfilunganya makungu ya vamatiko, xi va sivela ku ya emahlweni na wona.

¹¹ Kambe makungu ya xona ma tirha minkarhi hinkwayo, leswi xi swi anakanyaka, a swi siveriwi ni siku ni rin'we.

¹² Ku katekile tiko leri HOSI Xikwembu xi nga Xikwembu xa rona, lava xi va hlawuleke ku va vanhu va xona, a hi ku kateka ka vona!

¹³ HOSI Xikwembu xi languta vanhu xi ri etilweni, xi va vona hinkwavo;

¹⁴ xi xiyaxiya vanhu hinkwavo lava akeke emisaveni xi ri exiluvelweni xa xona.

¹⁵ Hi xona xi vumbeke timbilu ta vona hinkwato, xi tiva hinkwaswo leswi va swi endlaka.

¹⁶ Mufumi wa tiko a nga ponisiwi hi ku va ni mavuthu layo tala, ni nhenha a yi hluli hi mhaka ya matimba ya yona lamakulu.

¹⁷ Hanci a hi yona yi pfunaka munhu ku hlula valala, hambi yi ri ni matimba lamakulu, a yi pfuni mugadi ku baleka.

¹⁸ Vonani, HOSI Xikwembu xi hlayisa hinkwavo lava va xi chavaka, lava tshembaka rirhandzu ra xona;

¹⁹ hi xona xi va ntshunxaka ematimbeni ya rifu, xi va sirhelela ni le nkarhini wa ndlala.

²⁰ Hina hi tshemba HOSI Xikwembu, hi xona xi nga mupfuni ni mulweri wa hina.

²¹ Ina, hi tsakela xona hi timbilu ta hina hinkwato, hikuva hi tshemba vito ra xona lero hlawuleka.

²² We HOSI, leswi hi tshembaka wena, hi hlayise hi rirhandzu ra wena.