Pisalema 32 - BIBELE Mahungu Lamanene

Ku kateka ka munhu loyi a rivaleriweke milandzu

Swiletelo swa Davhida.

¹ Ku katekile munhu loyi ku homboloka ka yena ku nga ha hlayiwiki, loyi swidyoho swa yena swi rivaleriweke.

² Munhu loyi HOSI Xikwembu xi nga n'wi voniki nandzu, loyi mbilu ya yena yi nga riki na vukanganyisi, ú katekile ngopfu!

³ Enkarhini lowu a ndza ha fihla swidyoho swa mina, miri wa mina a wu tsanile, ndzi tshamela ku konya.

⁴ Vusiku ni nhlekanhi, a wu ndzi ba we HOSI, ndzi hela matimba kukota ximila lexi hisiwaka hi mumu.

⁵ Kutani ndzi boxile ku dyoha ka mina, a ndzi ku fihlelanga ku homboloka ka mina. Ndzi vurile ndzi ku: “Ndzi ta tisola eka HOSI, ndzi vula nandzu wa mina.” Kutani we HOSI, u ndzi rhurile ndzhwalo wa swidyoho swa mina.

⁶ Hikokwalaho, hinkwavo lava va ku tshembaka a va ku khongele loko nkarhi wa ha ri kona. Hambiloko khombo ri va tela kukota ndhambi, a ri nga va dlayi.

⁷ We HOSI, ndzi tumbela eka wena, u ndzi sirhelela emakhombyeni; leswi u ndzi sirheleleke ni ku ndzi lwela, ndzi ta ba nkulungwana wa ntsako.

⁸ HOSI Xikwembu xi ri: “Ndzi ta ku dyondzisa, ndzi ku komba ndlela leyi u fanelaka ku famba ha yona; ndzi ta ku letela, ndzi nga ka ndzi nga tshiki ku ku lwela.

⁹ U nga tshuki u fana ni hanci kumbe mbhongolo, swi nga swifuwo leswi pfumalaka ku twisisa: A swi yingisi loko swi nga nghenisiwanga matomu emilon'wini. Loko wena u yingisa, a wu nga weli hi khombo.”

¹⁰ Vanhu lavo homboloka va wela hi maxangu layo tala, kambe lava tshembaka HOSI Xikwembu, va sirheleriwa hi rirhandzu ra xona lero tshembeka.

¹¹ N'wina hinkwenu lava lulameke, tsakani mi tsakela HOSI, banani minkulungwana, n'wina hinkwenu va timbilu to basa!