Pisalema 31 - BIBELE Mahungu Lamanene

Xikhongelo xa loyi a tshembaka Xikwembu

Risimu ra Muyimbelerisi. Pisalema ya Davhida.

¹ We HOSI, ndzi ta ka wena leswaku u ta ndzi lwela, u nga pfumeli leswaku ndzi khomiwa hi tingana; We Xikwembu xo tshembeka, ndzi sirhelele!

² Rhiya ndleve u ndzi yingisa, hatlisa u ta ndzi ponisa, u va ribye ro tiya leri ndzi tumbelaka eka rona, ni khokholo leri ndzi hlayisekaka eka rona.

³ Hakunene, u ribye ra mina ni khokholo ra mina; ndzi kombe ndlela u tlhela u ndzi fambisa, leswaku vito ra wena ri nga sandziwi.

⁴ Ndzi phonyokise entlhan'wini lowu ndzi rhiyiweke ha wona, hikuva hi wena u nga xisirhelelo xa mina.

⁵ We HOSI, ndzi veka vutomi bya mina emavokweni ya wena; u ndzi kutsurile we HOSI, wena Xikwembu xo tshembeka.

⁶ Vanhu lava namarhelaka swikwembu swa hava, a ndzi twanani na vona. We HOSI, hi wena ntsena ndzi ku tshembaka.

⁷ Ndzi ta yimbelela ndzi tsakile, hikuva u ndzi kombile tintswalo, u vonile ku xanisiwa ka mina, ni maxangu ya mina u ma tivile.

⁸ A wu ndzi nyiketanga eka valala va mina, u ndzi famba-fambisile hinkwako hi ku ntshunxeka.

⁹ We HOSI, ndzi twele vusiwana, hikuva ndzi le khombyeni, gome ri ndzi heta matimba emirini ni le moyeni, ni ku vona a ndza ha voni.

¹⁰ Malembe ya vutomi bya mina ma hela ndzi ri karhi ndzi konya ndzi ri enhlomulweni, vusiwana byi ndzi heta ntamu, byi ndzi tshova ni swirho.

¹¹ Valala va mina hinkwavo va ndzi sandza, ngopfu-ngopfu lava ndzi akelaneke na vona; lava va ndzi tivaka, va ndzi chava, ni loko hi hlangana endleleni, va ndzi papalata.

¹² Vanhu va ndzi rivarile, a va ha ri na mhaka na mina, onge ndzi lo fa, kumbe ndzo va xibya lexi fayekeke.

¹³ Ndzi twa lavo tala va ku: “Munhu loyi wa nyenyetsa emutini hinkwawo!” Va twanana ku lwa na mina, va boha ni makungu ya ku ndzi dlaya.

¹⁴ Kambe mina ndzi tshemba wena, we HOSI, ndzi ri, u Xikwembu xanga.

¹⁵ Minkarhi hinkwayo ndzi hlayisiwa hi wena, hikokwalaho ndzi kutsule emavokweni ya valala va mina ni ya lava va ndzi xanisaka!

¹⁶ Ndzi nandza wa wena; ndzi langute hi tintswalo, u ndzi ponisa hi rirhandzu ra wena lero tshembeka.

¹⁷ We HOSI, u nga pfumeli leswaku ndzi khomiwa hi tingana, hikuva ndzi huwelela eka wena; lavo homboloka hi vona u fanelaka ku va khomisa tingana, va ya exivandleni xa vafi va nga ha ri na xo vula.

¹⁸ Vahembi lava vo titshemba ni ku tikukumuxa, lava nga chaviki ku lumbeta munhu wo lulama, va hundzule timbheveve!

¹⁹ Swilo leswinene leswi u swi hlayiselaka malandza ya wena a hi ku tala ka swona! U swi endlela lava tumbelaka ka wena, vanhu hinkwavo va ri karhi va swi vona.

²⁰ U va sirhelela laha u nga kona, kule ni lava bohaka makungu layo biha; u va sirhelela entsongeni wa wena, kule ni lava va va rhuketelaka.

²¹ Ndza ku nkhensa we HOSI: U ndzi kombile rirhandzu ra wena hi ndlela yo hlamarisa, hikuva a ndzi rhendzeriwe hi valala kukota muti lowu hlaseriwaka.

²² Eku chaveni ka mina a ndzi ku: Ndzi yisiwile kule na wena, a wu nga ha ndzi voni! Kasi wena u ndzi twile loko ndzi ku khongela, u twile ku huwelela ka mina loko ndzi kombela ku pfuniwa.

²³ Rhandzani HOSI, n'wina hinkwenu lava mi yi tshembaka; yi sirhelela lava pfumelaka eka yona, kambe lava va tikurisaka, yi va ba yi vuyelela.

²⁴ N'wina hinkwenu lava mi tshembaka HOSI, tiyani, mi nga heli matimba!