Pisalema 30 - BIBELE Mahungu Lamanene

Xikhongelo xo nkhensa

Risimu ra ku khangula Tempele. Pisalema ya Davhida.

¹ Ndzi ta ku twarisa we HOSI, hikuva u ndzi tsavurile exidziveni, a wu pfumelanga leswaku valala va mina va tsaka loko ndzi ri ekhombyeni.

² We HOSI Xikwembu xanga, ndzi huwelerile eka wena, kutani u ndzi horisile emavabyini.

³ We HOSI, u ndzi humesile exivandleni xa vafi; a ndzi ri karhi ndzi rhelela ndzi ya esirheni, kambe wena u ndzi hanyisile.

⁴ Yimbelelani mi dzunisa HOSI, n'wina lava mi yi tshembaka, yi tlangeleni mi twarisa vito ra yona lero hlawuleka,

⁵ hikuva vukari bya yona i bya nkarhinyana ntsena, kambe minkateko ya yona i ya vutomi hinkwabyo. Nimadyambu i mihloti, loko ri xa i minkulungwana!

⁶ Loko ndza ha titwa ndzi tiyile, a ndzi ku ndzi nge khuguriwi ndzi wa ni siku ni rin'we.

⁷ We HOSI, a wu ndzi katekisile, ndzi tiya kukota ntshava, kambe siku u nga ndzi fularhela, ndzi khomiwe hi ku chava lokukulu.

⁸ Kutani ndzi ku huwelerile we HOSI, ndzi kombela leswaku u ndzi tsetselela we N'wini wanga, ndzi ku:

⁹ “Loko ndzi fa, ndzi rhelela ndzi ya ekheleni ra vafi, xana swi ta ku pfuna yini ke? Xana loyi a feke a tlhelela entshurini, a nga ha ku dzunisa, a twarisa ku tshembeka ka wena xana?

¹⁰ We HOSI, ndzi yingise u ndzi tsetselela, tana u ta ndzi pfuna, we HOSI.”

¹¹ Ku rila ka mina u ku hundzurile ku tsaka, u ndzi hluvurile swiambalo leswo khwaxa swa nkosi, u ndzi ambexa swiambalo swa nkhuvo.

¹² Hikokwalaho, ndzi ta ku dzunisa hi mbilu ya mina hinkwayo, ndzi nga ka ndzi nga miyeli; We HOSI, Xikwembu xanga, ndzi ta ku tlangela hilaha ku nga heriki.