Pisalema 3 - BIBELE Mahungu Lamanene

Xikhongelo xa mixo xa loyi a tshembaka Xikwembu

Pisalema ya Davhida, enkarhini lowu a a baleka n'wana wa yena Abixalomu.

¹ We HOSI, valala va mina a hi ku tala ka vona, va tele lava ndzi pfukelaka!

² Va tele lava vulavulaka hi mina, va ku: “Xikwembu xi nga ka xi nga n'wi pfuni!”

³ Kambe we HOSI, u xitlhangu xa mina matlhelo hinkwawo, ndzi tidzunisa hi wena, hi wena u ndzi nyikaka xiyimo.

⁴ Ndzi tlakusa rito ndzi huwelela eka HOSI, kutani yi ndzi hlamula yi ri entshaveni ya yona leyo hlawuleka.

⁵ Ndzi tilatile ehansi, ndzi etlela, kambe ndzi tlhele ndzi pfuka, hikuva HOSI ya ndzi seketela.

⁶ A ndzi chavi vanhu va madzana-dzana lava ndzi jameleke matlhelo hinkwawo.

⁷ Pfuka, we HOSI! Xikwembu xanga, ndzi ponise, wena u baka valala va mina hinkwavo emarhameni, wena u tshovaka meno ya lavo homboloka!

⁸ Ku ponisa ku huma eka wena HOSI, minkateko ya wena a yi ve ehenhla ka vanhu va wena!