Pisalema 29 - BIBELE Mahungu Lamanene

Matimba ya Xikwembu ma tikomba hi xidzedze

Pisalema ya Davhida.

¹ N'wina swivumbiwa swa le tilweni, dzunisani HOSI Xikwembu, mi twarisa matimba ya xona;

² dzunisani ku kwetsima ka vito ra xona, mi xi nkhinsamela mi ambarile swiambalo leswo hlawuleka.

³ Rito ra HOSI ri twakala ehenhla ka malwandle, Xikwembu xo dzuneka xi dzindzisa tilo. HOSI yi fuma swidziva leswikulu.

⁴ Rito ra HOSI ri ni matimba swinene, ri komba vuhosi bya yona lebyi chavisaka.

⁵ Rito ra HOSI ri wisa mirhi ya mikedari, ri tshovelela misinya ya le Lebanoni,

⁶ ri tlula-tlurisa mirhi ya kona kukota marhole, ri tsekatsekisa tintshava ta Lebanoni na Siriyoni, ti tlalamba ku fana ni n'wana wa nyarhi.

⁷ Rito ra HOSI ri humesa malangavi ya ndzilo,

⁸ ri tsekatsekisa na wona mananga, HOSI yi tsekatsekisa mananga ya le Kadexe.

⁹ Rito ra HOSI ri endla leswaku timhunti ti hatla ti tswala, swimhuntana swi tswariwa nkarhi wu nga si fika. ETempeleni ya HOSI, hinkwavo va huwelela va ku: “Wa kwetsima, we HOSI!”

¹⁰ HOSI Xikwembu xi fuma swidziva swa mati, vuhosi bya xona byi nga ka byi nga heli.

¹¹ A xi tiyise vanhu va xona, xi va nyika minkateko ni ku rhula.