Pisalema 28 - BIBELE Mahungu Lamanene

Xikhongelo xo kombela ku pfuniwa

Pisalema ya Davhida.

¹ We HOSI, ndzi huwelela eka wena, u nga ndzi pfaleli tindleve, we ribye ranga, hikuva loko wo ndzi miyelela, ndzi ta ya eku loveni!

² Ndzi yingise loko ndzi ku khongela, loko ndzi huwelela eka wena ndzi kombela ku pfuniwa, ni loko ndzi tlakusa mavoko ya mina ndzi ma kongomisa exivandleni xa wena lexo hlawuleka ngopfu.

³ U nga tshuki u ndzi katsa ni lavo homboloka, ndzi vula vona lava endlaka leswo biha: Va tiendla vanhu vanene loko va vulavula ni vaakelani, kasi timbilu ta vona ti tele vukanganyisi.

⁴ Va be hi ku ya hi mintirho ya vona, ni swiendlo swa vona leswo homboloka; va bele leswi va swi endleke hi mavoko ya vona, u va nyika hakelo leyi yi va ringaneke.

⁵ Vanhu lava, u ta va ba va wela hansi va nga ha pfuki, hikuva a va na mhaka ni leswi u swi endlaka we HOSI, kumbe leswi u swi vumbeke hi mavoko ya wena.

⁶ A ku dzunisiwe HOSI, hikuva yi ndzi yingisile loko ndzi ri karhi ndzi khongela.

⁷ HOSI hi yona matimba ni xitlhangu xanga, ndzi tshemba yona ntsena; sweswi ndzi pfunekile, kutani mbilu ya mina yi tele ntsako, ndzi nkhensa HOSI hi ku yimbelela tinsimu.

⁸ HOSI hi yona matimba ya vanhu va yona, ni khokholo leri Muhlawuriwa wa yona a tumbelaka ka rona.

⁹ We HOSI, ponisa vanhu va wena u va katekisa, hikuva i ndzhaka ya wena; va hlayise hilaha ku nga heriki, hikuva u murisi wa vona.