Pisalema 26 - BIBELE Mahungu Lamanene

Xikhongelo xa munhu loyi a lumbetiwaka

Pisalema ya Davhida.

¹ We HOSI, kombisa leswaku a ndzi na nandzu, hikuva ndzi endlile leswinene ntsena; mina a ndzi tshiki ku titshembela wena.

² We HOSI, ndzi kambele u ndzi xiyaxiya, kambela leswi nga mbilwini ya mina ni le miehleketweni ya mina.

³ Ndzi tshama ndzi ri karhi ndzi anakanya rirhandzu ra wena, ndzi rhangeriwa emahlweni hi ku tshembeka ka wena.

⁴ A ndzi tshami ni vaxisi, ni tinyoka-hansi a ndzi famba-fambi na tona.

⁵ Ndzi swi venga ngopfu ku hlangana-hlangana ni lava endlaka leswo biha, ni vanhu lavo homboloka a ndzi swi tsakeli ku hungasa na vona.

⁶ We HOSI, ku komba leswaku a ndzi na nandzu, ndzi hlamba mavoko ya mina, kutani ndzi ya rhendzeleka alitari ya wena,

⁷ ndzi ri karhi ndzi yimbelela risimu ra minkhenso hi rito leri tlakukeke, ndzi twarisa mintirho ya wena hinkwayo leyo hlamarisa.

⁸ We HOSI, yindlu leyi u tshamaka eka yona ndzi yi rhandza ngopfu, yona leyi ku dzuneka ka wena ku tikombaka eka yona.

⁹ U nga ndzi herisi swin'we ni vadyohi, u nga ndzi katsi ni vanhu lava tsakelaka ngopfu ku halata ngati,

¹⁰ va nga vanhu lava endlaka swa manyala, lava khomeke swilo swo tala leswi va xaviweke ha swona.

¹¹ Loko ndzi ri mina, ndzi endla leswinene ntsena; ndzi twele vusiwana we HOSI, u ndzi ponisa!

¹² Mina ndzi titwa ndzi tshamisekile, kutani ndzi ta dzunisa HOSI Xikwembu enhlengeletanweni ya xona leyikulu.