Pisalema 25 - BIBELE Mahungu Lamanene

Xikhongelo xo kombela ku hlayisiwa hi Xikwembu

Pisalema ya Davhida.

¹ We HOSI, ndzi tlakusa mahlo ndzi languta eka wena,

² We Xikwembu xanga, ndzi tshembile wena; u nga pfumeli leswaku ndzi khomiwa hi tingana, u nga ndzi tshiki ndzi hundzuka xihlekiso eka valala va mina.

³ Exikarhi ka lava va ku tshembaka, ku hava na un'we la khomiwaka hi tingana, hikuva tingana i ta lava kanganyisaka van'wana, va tlanga hi vona.

⁴ We HOSI, ndzi dyondzise tindlela ta wena, u endla leswaku ndzi ti tiva.

⁵ Ndzi fambise entiyisweni wa wena, u ri karhi u ndzi dyondzisa, hikuva hi wena Xikwembu lexi xi ndzi ponisaka, minkarhi hinkwayo ndzi tshemba wena.

⁶ We HOSI, u nga rivali ku ndzi komba tintswalo ta wena ni rirhandzu ra wena, hikuva swi vile kona ku sukela ni khale.

⁷ U nga anakanyi swidyoho ni swihoxo swa vuntshwa bya mina; ndzi tsundzuke we HOSI, hikwalaho ka rirhandzu ra wena ni vunene bya wena!

⁸ HOSI Xikwembu xi tele vunene ni ku lulama, hikokwalaho xi dyondzisaka vadyohi ku famba endleleni leyinene.

⁹ Xi dyondzisa lava titsongahataka ku endla leswo lulama, xi va komba ni tindlela ta xona.

¹⁰ Tindlela hinkwato ta HOSI Xikwembu ti komba rirhandzu ra xona ni ku tshembeka ka xona eka lava hlayisaka ntwanano wa xona ni switsundzuxo swa xona.

¹¹ We HOSI, swidyoho swa mina swi tele ngopfu, ndzi rivalele swona, leswaku vito ra wena ri ta dzunisiwa.

¹² HOSI Xikwembu xi komba munhu loyi a xi chavaka ndlela leyi a fanelaka ku hlawula yona.

¹³ Munhu wo tano ú ta tshama emafurheni, ni vana va yena va ta kuma tiko ri va ra vona.

¹⁴ HOSI Xikwembu i nakulobye wa lava va xi chavaka, xi va tivisa leswi ntwanano wa xona wu lavaka swona.

¹⁵ Minkarhi hinkwayo ndzi languta eka HOSI Xikwembu, hikuva hi xona xi nga ta ndzi ntshunxa loko ndzi phasiwile.

¹⁶ We HOSI, hundzuluka u ndzi languta, u ndzi twela vusiwana, hikuva ndzo va ndzexe, ndzi le ku xanisekeni.

¹⁷ Herisa nhlomulo lowu nga mbilwini ya mina, u ndzi susa emaxangwini lawa ndzi nga ka wona.

¹⁸ Languta, ndzi le khombyeni, ndza xaniseka; hikokwalaho ndzi rivalele swidyoho swa mina hinkwaswo.

¹⁹ Anakanya ku tala ka lava va lwaka na mina, ni ku chavisa ka rivengo leri va nga na rona eka mina.

²⁰ We HOSI, ndzi sirhelele, u ndzi lamulela eka valala, u nga ndzi tshiki ndzi khomiwa hi tingana, hikuva hi wena u nga khokholo ra mina.

²¹ Vunene ni ku lulama a swi ve swona swi ndzi hlayisaka, hikuva ndzi tshemba wena ntsena.

²² We Xikwembu, kutsula Vaisraele emaxangwini hinkwawo lawa va nga ka wona!