Pisalema 24 - BIBELE Mahungu Lamanene

Mufumi la dzunekaka ú nghena emutini

Pisalema ya Davhida.

¹ Misava ni hinkwaswo leswi nga ka yona i swa HOSI Xikwembu; matiko ni hinkwavo lava akeke eka wona i swa xona.

² Xi andlarile misava ehenhla ka mati ya le hansi, xi yi tiyisile ehenhla ka swidziva.

³ Xana i vamani lava nga ta tlhandlukela entshaveni ya HOSI Xikwembu xana? Lava nga ta yima endhawini ya xona leyo hlawuleka i vamani xana?

⁴ Hi lava nga ni timbilu to basa ni mavoko lama tengeke, lava nga naveliki swilo swa hava, lava nga hlambanyiki hi ku xisa.

⁵ Vanhu vo tano, HOSI Xikwembu xi ta va katekisa, xi ta va lwela, xona xi nga muponisi wa vona.

⁶ Vanhu volavo va navela HOSI, va tsakela vukona bya xona Xikwembu xa va ka Yakobo.

⁷ N'wina tinyangwa, tlakukani swinene, pfulekani, n'wina timbanti ta khale, leswaku mufumi wo dzuneka a ta kota ku nghena.

⁸ Mufumi wo dzuneka i mani xana? I HOSI, Xikwembu xa matimba lamakulu, xona xi nga nhenha etinyimpini.

⁹ N'wina tinyangwa, tlakukani swinene, pfulekani, n'wina timbanti ta khale, leswaku mufumi wo dzuneka a ta kota ku nghena.

¹⁰ Mufumi wo dzuneka i mani xana? I HOSI, Xikwembu xa matimba hinkwawo! Hi xona xi nga mufumi wo dzuneka!