Pisalema 22 - BIBELE Mahungu Lamanene

Xikwembu xanga, Xikwembu xanga, u ndzi tshikele yini!

Risimu ra Muyimbelerisi, hi mayimbelele ya risimu leri nge “Mhunti ya vurhonga”. Pisalema ya Davhida.

¹ Xikwembu xanga, Xikwembu xanga, u ndzi tshikele yini! Ndzi le ku konyeni, ndzi kombela ku pfuniwa; u yimela yini kule na mina xana?

² Xikwembu xanga, ndzi huwelela ka wena ninhlekanhi, kambe a wu hlamuri; ndzi huwelela nivusiku, kambe a ndzi kumi ku wisa.

³ Hambiswiritano, wena u Muhlawuleki loyi Vaisraele va dzunisaka vuhosi bya yena.

⁴ Vatata wa hina a va ku tshemba; u va kutsurile, hikuva a va tshemba wena ntsena.

⁵ Va huwelerile eka wena, kutani u va kutsula; a va khomiwanga hi tingana, hikuva a va tshemba wena.

⁶ Kambe mina a ndzi munhu wa nchumu, ndzo va xivungu; vanhu va ndzi monya, va ndzi langutela hansi.

⁷ Hinkwavo lava va ndzi vonaka, va ndzi hlekula, va minyula, va hlakahla ni tinhloko, va ku:

⁸ “Wena u ri u titshembele HOSI Xikwembu! Loko hakunene xi ku tsakela, a xi ku ponise, xi ku kutsula.”

⁹ Hi wena u ndzi humeseke ekhwirini ra manana, u ndzi hlayisa exifuveni xa yena.

¹⁰ Ku sukela siku leri ndzi nga velekiwa ha rona, ndzi nyiketiwile eka wena; u vile Xikwembu xanga ku sukela evuhlangini bya mina.

¹¹ Khombo ri le kusuhi, hikokwalaho u nga vi kule na mina, hikuva ku hava un'wana loyi a nga ndzi pfunaka.

¹² Valala lava va ndzi rhendzeleke, va tele, va kota tinkuzi letikulu to chavisa ta le Baxani;

¹³ va pfula milomo ya vona kukota tinghala leti bongaka, leti lavaka ku ndzi handzulela.

¹⁴ Matimba ya mina ma hela kukota mati lama halatiweke, marhambu ya mina hinkwawo ma gudla-gudla, ni mbilu ya mina yi fana ni mafurha lama n'okisiwaka endzilweni.

¹⁵ Nkolo wa mina wu omile kukota xirhengele, ririmi ri namarhela emalakeni; we Hosi, u ndzi tsongahatile ku yisa eku feni.

¹⁶ Ntshungu wa lavo homboloka wu ndzi rhendzele kukota timbyana, wu ndzi handzulele milenge ni mavoko.

¹⁷ Ndzi ondzile, ndzi lo sala timbambu ntsena, valala va ndzi languta hi ku ndzi honokela;

¹⁸ va avelana swiambalo swa mina hi ku hoxa vuhlolotwana.

¹⁹ We HOSI, u nga yimi kule na mina! Hatlisa u ta ndzi lamulela, wena u ndzi nyikaka matimba.

²⁰ Ndzi ponise enyimpini leyi, u kutsula vutomi bya mina emilon'weni ya timbyana leti.

²¹ Ndzi ponise emin'waleni ya tinghala, loko ndzi ri etimhondzweni ta tinyarhi, ndzi lamulele!

²² Ndzi ta tivisa vamakwerhu leswaku hi wena mani, ndzi ta ku dzunisa exikarhi ka ntshungu ndzi ku:

²³ “N'wina lava chavaka HOSI Xikwembu, xi dzuniseni, xi tlangeleni, n'wina hinkwenu va ka Yakobo, mi xi komba xichavo, n'wina hinkwenu Vaisraele,

²⁴ hikuva a xi solanga loyi a nga nhlomulweni, kumbe ku n'wi honisa; a xi n'wi fularhelanga, kambe xi n'wi yingisile loko a huwelela eka xona.”

²⁵ Hi wena u ndzi nyikaka matimba ya ku ku dzunisa exikarhi ka ntshungu lowukulu, emahlweni ka lava va ku chavaka, ndzi ta ku humesela magandzelo lawa ndzi nga tiboha ku ma humesa.

²⁶ Swisiwana swi ta dya swi xurha; lava va ku chavaka, va ta ku dzunisa we HOSI, va engeteriwa masiku ya ku hanya.

²⁷ Vanhu vo huma ematikweni hinkwawo va ta tsundzuka HOSI Xikwembu, va ta eka xona, vanhu va tinxaka hinkwato va ta xi nkhinsamela.

²⁸ Vuhosi hinkwabyo i bya xona, hi xona xi fumaka vanhu hinkwavo.

²⁹ Vanhu hinkwavo va misava lava tikurisaka, va ta tsongahatiwa emahlweni ka N'wini wa hinkwaswo. Hinkwavo lava faka va ta n'wi nkhinsamela, va nga lava hlulekeke ku hlayisa vutomi bya vona.

³⁰ Vatukulu va vona va ta n'wi tirhela; vanhu va minkarhi leyi taka, va ta byeriwa ta yena,

³¹ lava nga si velekiwaka va ta tivisiwa leswaku hi yena la kutsuleke Vaisraele.