Pisalema 21 - BIBELE Mahungu Lamanene

Xikhongelo xo tlangela ku hluriwa ka valala

Risimu ra Muyimbelerisi. Pisalema ya Davhida.

¹ Mufumi wa tiko ú tsakisiwa hi matimba ya wena we HOSI, ú tsake ngopfu, hikuva u n'wi pfunile ku hlula valala va yena.

² Leswi a a swi navela, u n'wi nyikile, u wu n'wi tsonanga leswi a swi kombeleke.

³ U tile eka yena, u n'wi katekisa swinene, u n'wi tlhandlekile xidlodlo xa nsuku wo tenga enhlokweni.

⁴ Ú komberile vutomi eka wena, kutani u n'wi nyikile, u n'wi andzisele ni masiku ya ku hanya.

⁵ Ku dzuneka ka yena i kukulu, hikuva u n'wi pfunile, u n'wi nyikile ndzhuti ni ku chaviseka.

⁶ Hi wena u endleke leswaku a kateka minkarhi hinkwayo, a tshama a tsakile emahlweni ka wena.

⁷ Mufumi wa tiko ú tshemba HOSI, Xikwembu xa le henhla-henhla, a nga ka a nga khuguriwi a wa, hikuva xa n'wi sirhelela hi rirhandzu ra xona lero tshembeka.

⁸ Ú ta hlula valala va yena hinkwavo, ni lava va n'wi vengaka, ú ta va hangalasa.

⁹ Loko u humelela we mufumi, u ta fana ni malangavi ya ndzilo, HOSI Xikwembu a xi herise valala va wena, xi va hisa hi ndzilo wa vukari bya xona.

¹⁰ Vana ni vatukulu va vona, u ta va herisa laha misaveni, a ku nga poni na un'we wa vona.

¹¹ Vanhu va nga hlengeletana endhawini yin'we va boha makungu ya ku lwa na wena, kambe va nga ka va nga humeleli,

¹² hikuva wena u ta va hlongorisa, u va copa tinhloko hi miseve.

¹³ We Hosi komba matimba ya wena, leswaku hi ta yimbelela, hi tlangela vunhenha bya wena.