Pisalema 20 - BIBELE Mahungu Lamanene

Xikwembu a xi tiyise hosi ya tiko

Risimu ra Muyimbelerisi. Pisalema ya Davhida.

¹ HOSI Xikwembu a xi ku hlamule hi siku ra khombo, vito ra Xikwembu xa Yakobo a ri ku sirhelele!

² A xi ku rhumele ku pfuniwa loku humaka eTempeleni, ni ku seketeriwa loku humaka eSiyoni!

³ A xi tsundzuke tinyiko hinkwato leti u ti humeseke, xi amukela ni magandzelo ya wena lama hisiwaka!

⁴ A xi ku nyike leswi u swi navelaka embilwini, xi katekisa makungu ya wena hinkwawo!

⁵ Hi ta ba minkulungwana hi tlangela ku hlula ka wena, hi yimisa mijeko ya hina hi vito ra Xikwembu xa hina. HOSI Xikwembu a xi ku nyike hinkwaswo leswi u swi kombelaka!

⁶ Sweswi ndza swi tiva leswaku HOSI Xikwembu xi ta pfuna Muhlawuriwa wa xona; xi ta n'wi hlamula xi ri eTempeleni ya xona ya le matilweni, xi n'wi nyika ku hlula valala hi matimba lamakulu ya voko ra xona ra xinene.

⁷ Van'wana va titshembela makalichi, van'wana tihanci, kambe hina hi titshembela vito ra HOSI Xikwembu xa hina.

⁸ Va ta hela matimba, va wa, kambe hina hi ta yima hi ku tsèrhè!

⁹ We HOSI, nyika mufumi wa tiko matimba yo hlula! Hi hlamule, siku hi rilaka eka wena.