Pisalema 2 - BIBELE Mahungu Lamanene

Ta Muhlawuriwa wa Xikwembu

¹ Hikwalaho ka yini matiko ma pfuxa nkitsikitsi xana? Xana vanhu va tinxaka-xaka va kanelela yini makungu lama nga pfuniki nchumu xana?

² Tihosi ta misava ti jamile, vafumi va matiko va twananile ku lwa na HOSI Xikwembu ni Muhlawuriwa wa xona,

³ va ku: “A hi tsemeni tinketani leti va hi boheke ha tona, hi cukumetela kule tinghole leti va hi tsimbeke ha tona!”

⁴ Kambe loyi a tshameke ematilweni wa hleka, N'wini wa hinkwaswo wa va hlekula,

⁵ kutani ú vulavula na vona a karihile, a va chavisa hi ku kariha ka yena, a ku:

⁶ “Ndzi vekile hosi leyi ndzi yi tsakelaka emutini wa Siyoni, entshaveni ya mina leyo hlawuleka.”

⁷ Ndzi ta twarisa leswi HOSI Xikwembu xi swi boheke; Xi te ka mina: “U n'wananga, namuntlha ndzi ku tswarile.

⁸ Kombela eka mina, kutani ndzi ta ku nyika matiko ma va ndzhaka ya wena, misava hinkwayo yi ta va ya wena ku ya fika evugimamusi.

⁹ U ta ma faya hi nhonga ya nsimbhi, u ma cakanyetela ku fana ni mbita ya vumba.”

¹⁰ Sweswi ke n'wina tihosi, tlharihani; tivoneleni, n'wina mi fumaka vanhu laha misaveni.

¹¹ Tirhelani HOSI Xikwembu hi xichavo, mi rhurhumela emahlweni ka xona.

¹² Nkhinsamani emilengeni ya xona, xi ta ka xi nga karihi, na n'wina mi ta ka mi nga lovi ma ha ri endleleni, hikuva vukari bya xona byi hatla ku pfurha. Va katekile hinkwavo lava tumbelaka eka xona.