Pisalema 19 - BIBELE Mahungu Lamanene

Ntumbuluko wu dzunisa Xikwembu

Risimu ra Muyimbelerisi. Pisalema ya Davhida.

¹ Matilo ma karhi ma vula ku dzuneka ka Xikwembu, mpfhuka wu twarisa ntirho wa mavoko ya xona.

² Siku ri kanela swona na rin'wana siku, vusiku byi vikela byin'wana vusiku evutlhari bya kona.

³ A swi na ririmi kumbe marito, ni mpfumawulo a swi na wona;

⁴ kambe ku vulavula ka swona ku hangalaka emisaveni hinkwayo, ni marungulo ya swona ma fika evugimamusi. Kona kwale, Xikwembu xi dzimele dyambu entsonga:

⁵ Loko ri huma, ri fana ni muteki la pfukaka endlwini ya yena; ri khoma ndlela ya rona ri tsakile kukota wanuna wa xitsutsumi emphikisanweni;

⁶ ri tlhava lomu matilo ma sungulaka kona, ri rhendzeleka ri ya tlomuta laha ma helelaka kona; a ku na nchumu lowu nga balekaka ku hisa ka rona.

Nawu wa Xikwembu wu hetisekile

⁷ Nawu wa HOSI wu hetisekile, wu hanyisa moya; switsundzuxo swa yona swi tiyile, swi tlharihisa vo kala mano.

⁸ Swiletelo swa HOSI swi lulamile, swi tsakisa mbilu; swileriso swa yona swi tengile, swi hanyanyisa mahlo;

⁹ ku chava HOSI i mhaka leyinene, leyi nga ta ka yi nga heli; leswi HOSI yi swi bohaka i ntiyiso, swi lulamile hinkwaswo ka swona;

¹⁰ swi navetisa ku tlula ni nsuku, hambi wu ri lowo tala, lowu tengeke; swi tsokombela ku tlula ni vulombe, hambi byi ri lebyi tshonaka exihlengeni.

¹¹ Hi swona leswi swi ndzi tsundzuxaka, mina nandza wa wena; ku hlayisa swona swa ndzi vuyerisa swinene.

¹² I mani loyi a nga vonaka swihoxo swa yena xana? Ndzi basise eka milandzu leyi tumbeleke.

¹³ Ndzi papalatise swidyoho swa lava titshembaka, swi nga tshuki swi ndzi fuma, mina nandza wa wena; kutani ndzi ta va ndzi nga ri na nandzu, ndzi ta va ndzi ponile eka vudyoho lebyikulu.

¹⁴ Marito ya mina ni miehleketo ya mina, a swi ve leswi amukelekaka emahlweni ka wena, we HOSI, wena u nga ribye ra mina ra vutumbelo, ni mukutsuri wanga.