Pisalema 18 - BIBELE Mahungu Lamanene

Risimu ra Davhida ro tlangela ku ponisiwa

Risimu ra Muyimbelerisi. Pisalema ya Davhida, nandza wa HOSI Xikwembu. Siku Davhida a ponisiweke hi HOSI eka valala va yena hinkwavo ni le mavokweni ya Sawulo, ú yi dzunisile hi risimu leri, a ku:

¹ Ndza ku rhandza we HOSI, wena matimba ya mina.

² HOSI i vutumbelo bya mina, i khokholo ranga ni mukutsuri wanga, i Xikwembu xa mina, ni ribye ranga leri ndzi tumbelaka eka rona; i xitlhangu xa mina, lexi nga ni matimba ya ku ndzi ponisa, naswona i khokholo ra mina.

³ A ku dzunisiwe HOSI! Ndzi huwelela eka yona, kutani ndzi ponisiwa eka valala va mina.

⁴ Mapindzi ya rifu a ma ndzi tsondzerile, ni maboboma lama lovisaka a ma ndzi khukhurile.

⁵ Xivandla xa vafi a xi ndzi phasa-phasile hi tinghole ta xona, rifu a ri ndzi rhiyele ntlhamu wa rona.

⁶ Emaxangwini ya mina, ndzi vitanile HOSI, ndzi huwelela eka Xikwembu xanga; kutani xi twile rito ra mina xi ri eTempeleni ya xona; loko ndzi rila eka xona, xi ndzi twile.

⁷ Kavaloko misava yi ninginika, yi tsekatseka, kutani masungulo ya tintshava ma rhurhumela ni ku gudlagudla, hikuva HOSI a yi pfurha hi vukari.

⁸ Tinhompfu ta yona ti huma musi, ni nomo wa yona wu huma ndzilo lowu herisaka, makala lama vuvumelaka ma huma eka yona.

⁹ Kutani HOSI yi ovela matilo ehansi, yi rhelela yi tlhandlekile milenge ehenhla ka papa ra ntima,

¹⁰ yi khandziya golonyi ya mapapa, yi haha ha yona, yi rhelela yi ri etimpapeni ta moya.

¹¹ HOSI yi tisiva hi xinyami matlhelo hinkwawo, ehenhla ka yona ku ri ni mapapa lamakulu ya ntima, yo tala mati.

¹² Rihati ri vangama emahlweni ka yona emapapeni, ku huma xihangu ni makala lama vuvumelaka;

¹³ kutani HOSI yi bonga yi ri etilweni, Xikwembu xa le henhla-henhla xi huwelela hi rito lerikulu, xi humesa xihangu ni makala lama vuvumelaka.

¹⁴ HOSI yi copa valala hi miseve ya yona, yi va hangalasa, yi vangamisa rihati, yi va hlanganisa tinhloko.

¹⁵ Ehansi ka lwandle, ka vonaka, siku u karihelaka valala va wena, we HOSI; masungulo ya misava ma fununguriwa, siku vukari bya wena byi bulukaka.

¹⁶ HOSI yi tshambulutile voko ra yona yi ri ehenhla, yi ndzi khoma, yi ndzi humesa exidziveni.

¹⁷ Yi ndzi ponisile emavokweni ya nala wa mina wa matimba, ni ka lava a va ndzi venga, hikuva a va ndzi tlula hi ntamu.

¹⁸ A va ndzi sivelerile loko ndzi ri ekhombyeni, kambe HOSI yi ndzi seketerile.

¹⁹ Yi ndzi ntshunxile, yi ndzi lamulela, hikuva ya ndzi tsakela.

²⁰ HOSI yi ndzi nyikile leswi yelanaka ni mintirho ya mina leyo lulama; yi ndzi hakerile leswi ringanaka ni ku tenga ka mavoko ya mina,

²¹ hikuva ndzi fambile etindleleni ta HOSI, ni ku xi dyohela a ndzi xi dyohelanga, Xikwembu xa mina;

²² swileriso swa xona hinkwaswo, ndzi swi hlayisile, ni milawu ya xona, a ndzi yi tlulanga.

²³ HOSI a yi kumanga nandzu eka mina, hikuva ku dyoha, a ndzi ku chava ngopfu.

²⁴ Hikokwalaho, HOSI yi ndzi hakerile leswi yelanaka ni ku lulama ka mina, ni ku tenga loku yi ku voneke emavokweni ya mina.

²⁵ We HOSI, u tshembekile eka loyi a tshembekaka; a wu veki nandzu eka munhu loyi a nga riki na nandzu.

²⁶ U komba ku tenga ka wena eka loyi a tengeke; kambe u komba ku tlhariha ka wena eka loyi a endlaka leswo homboloka.

²⁷ Hi wena la ponisaka vaxaniseki, kambe u tsongahata lava tikurisaka.

²⁸ Hakunene, hi wena la ndzi lumekelaka rivoni! We HOSI Xikwembu xa mina, wa ndzi voningela exinyamini.

²⁹ Hi ku pfuniwa hi wena, ndzi nga pyanyetela ntlawa wa vahlaseri. Hi matimba ya wena Xikwembu xanga, rirhangu, ndzi nga ri tlula.

³⁰ Tindlela ta Xikwembu ti hetisekile; leswi HOSI yi swi vulaka, swi kumeka swi tiyile; hi yona xitlhangu xa hinkwavo lava tumbelaka eka yona.

³¹ I mani la nga Xikwembu, loko ku nga ri HOSI ke? Ribye ra vutumbelo i mani, ehandle ka Xikwembu xa hina xana?

³² Hi xona Xikwembu lexi xi ndzi haverisaka matimba, lexi xi ndzi pfulelaka ndlela yo fambeka swinene.

³³ Xi vevukisa milenge ya mina ku fana ni ya timhunti, xi ndzi tiyisa eka xiyimo xa mina xa le henhla.

³⁴ Xi ndzi dyondzisa malwele ya nyimpi, mavoko ya mina ma kondza ma kota ku konga vurha bya koporo.

³⁵ We HOSI, u ndzi tamerisa xitlhangu ku nga ku ponisa ka wena; voko ra wena ra xinene ra ndzi seketela, wa ndzi kurisa, loko u tikarhatela mina.

³⁶ U ndzi boxela ndlela yo anama yo famba ha yona, kutani milenge ya mina a yi rhetemuki.

³⁷ Ndzi hlongorisa valala va mina ndzi kondza ndzi va kuma, a ndzi vuyi ndzi nga si va herisela makumu.

³⁸ Ndzi va fayetela, kutani va tsandzeka ku pfuka, ndzi va wisa, ndzi va kandziyela.

³⁹ U ndzi haverisa matimba ya ku ya enyimpini, u sindzisa lava a va lwa na mina ku ndzi nkhinsamela.

⁴⁰ U endla leswaku valala va mina va ndzi komba xikosi, kutani lava va ndzi vengaka, ndza va herisa!

⁴¹ Va tlhava mukhosi, kambe a ku na loyi a va lamulelaka; va huwelela eka HOSI, kambe a yi va hlamuli.

⁴² Ndzi va sila ku fana ni ritshuri leri hahisiwaka hi moya; ndzi va kuha kukota ndzhope egondzweni.

⁴³ U ndzi kutsurile, loko tiko ri ndzi pfukela; u ndzi vekile ku va mufambisi wa matiko, kutani vanhu lava a ndzi nga va tivi, sweswi i malandza ya mina.

⁴⁴ Kan'we kan'we loko va twa ta mina, va tinyiketa eka mina, vanhu vambe va ta eka mina va tilondlile,

⁴⁵ va hela matimba, va huma hi ku rhurhumela emakhokholweni ya vona.

⁴⁶ HOSI Xikwembu xa hanya, a ku dzunisiwe xona xi nga ribye ra mina ra vutumbelo, a ku twarisiwe Xikwembu lexi xi ndzi ponisaka.

⁴⁷ Hi xona Xikwembu lexi xi ndzi rihiselaka, lexi sindzisaka matiko ku va ehansi ka mina.

⁴⁸ We Xikwembu, wa ndzi ntshunxa emavokweni ya valala va mina, hakunene u ndzi pfuna ku hlula lava lwaka na mina, u ndzi lamulela eka vanhu va tihanyi.

⁴⁹ Hikokwalaho, we HOSI, ndzi ta ku twarisa exikarhi ka vamatiko, ndzi ta yimbelela tinsimu ndzi dzunisa vito ra wena.

⁵⁰ HOSI Xikwembu xi nyika ku hlula lokukulu eka loyi xi n'wi vekeke ku va hosi, xi komba tintswalo ta xona leto tshembeka eka Davhida muhlawuriwa wa xona, ni ka vatukulu va yena hilaha ku nga heriki.