Pisalema 17 - BIBELE Mahungu Lamanene

Xikhongelo xa munhu loyi a ngo dlawela mahala

Xikhongelo xa Davhida.

¹ We HOSI, twana ntiyiso wa mhaka, rhiya ndleve, u twa xirilo xa mina; yingisa xikhongelo xa mina, hikuva xi huma enon'weni lowu nga riki na vuxisi.

² Ku pembela ka mina a ku hume eka wena, mahlo ya wena a ma vone ntiyiso wa mhaka!

³ U ndzi endzerile nivusiku, ku ta xiya mbilu ya mina, ni ku ndzi kambisisa, kambe a wu kumanga nchumu xa tingana;

⁴ a ndzi vulanga nchumu xo biha hi tlhelo ra leswi vanhu va swi endlaka, swiletelo swa wena, ndzi swi hlayisile.

⁵ Ndzi tiyiserile ku famba hi tindlela leti u ndzi leriseke tona, milenge ya mina a yi hambukanga emintileni ya wena.

⁶ Ndzi huwelela eka wena, hikuva u ta ndzi hlamula, we Xikwembu. Tshineta ndleve ya wena eka mina, u yingisa leswi ndzi swi vulaka.

⁷ Komba ku hlamarisa ka tintswalo ta wena leto tshembeka, wena muponisi wa lava balekaka valala va vona, va ta lava vutumbelo evokweni ra wena ra xinene.

⁸ Ndzi hlayise tanihi ndzololo ya tihlo ra wena, ndzi tumbete endzhutini wa timpapa ta wena,

⁹ u ndzi fihla eka lavo homboloka lava va ndzi hlaselaka, vona valala va mina lavo chavisa, lava va ndzi rhendzeleke.

¹⁰ Va file ripfalo, a va tsetseleli, va tikurisa hi ku vulavula.

¹¹ Va ndzi hlongorisa, sweswi va ndzi rhendzerile, va lo honoo, mahlo, va lava ku ndzi wisela hansi.

¹² Va fana ni nghala, leyi nga ni mahika ya ku bvanyangeta; va bvutamile tanihi n'wana wa nghala exihlahleni.

¹³ Suka u yima, we HOSI! Va hlanganise, u va wisela ehansi. Ndzi lwele hi fumu ra wena eka vanhu lava vo homboloka.

¹⁴ We HOSI, ndzi ponise hi voko ra wena eka vanhu lava vo biha, lava averiweke vutomi bya nkarhinyana ntsena. Va xurhise hi leswi u nga va vekela swona, vana va vona a va kolwe ha swona, va siyela ni vatukulu va vona.

¹⁵ Loko a ri mina, ndzi ta vona mombo wa wena ndzi ri loyi a pembeleke; loko ndzi pfuka, ndzi ta kolwa hi ku ku vona, wena hi xiviri xa wena!