Pisalema 16 - BIBELE Mahungu Lamanene

Ndzhaka yo saseka ngopfu

Xitlhokovetselo xa Davhida.

¹ We Xikwembu, ndzi hlayise, hikuva hi wena khokholo na mina.

² Eka HOSI, ndzi ri: “Hi wena n'wini wa mina, a ndzi kumi ntsako loko ku nga ri ha wena ntsena.”

³ Loko swi ri swikwembu leswi va nge “swi hlawulekile” laha tikweni, ni leswi va nge “swi ni matimba”, leswi khale a ndzi swi tsakela, ndzi ri,

⁴ lava tsutsumelaka eka swona, va tivangela maxangu layo tala; mina ndzi nga ka ndzi nga swi phahli hi ngati, hambi ma ri mavito ya swona, a ndzi nga ma kumbuki.

⁵ We HOSI, hi wena ndzhaka leyi ndzi averiweke yona, hi wena u ndzi timulaka torha; vutomi bya mina byi fumbarheriwile hi wena.

⁶ Ndzi averiwile vutshamo etindhawini leti tsakisaka, ina, ndzi nyikiwile ndzhaka yo saseka ngopfu.

⁷ Ndzi tlangela HOSI, yona leyi yi ndzi letelaka; nivusiku ripfalo ri ndzi tsundzuxa ta yona.

⁸ Minkarhi hinkwayo, ndzi rhangisa HOSI emahlweni ka mina; ndzi nga ka ndzi nga tsekatseki, hikuva yi le vokweni ra mina ra xinene.

⁹ Hikokwalaho, mbilu ya mina yi tsakile, nomo wa mina wu ba nkulungwana, na wona miri wa mina wu titwa wu hlayisekile.

¹⁰ We HOSI, a wu nga ndzi nyiketi exivandleni xa vafi, a wu nga ndzi yisi enon'weni wa sirha, mina ndzi ku khongelaka.

¹¹ U ndzi komba ndlela ya vutomi, laha u nga kona, ntsako wa khapa; evokweni ra wena ra xinene, ka tiphiniwa hilaha ku nga heriki.