Pisalema 149 - BIBELE Mahungu Lamanene

Xikwembu xi lwela vanhu va xona

¹ Dzunisani HOSI! Yimbelelani risimu lerintshwa mi dzunisa HOSI Xikwembu, xi tlangeleni exikarhi ka ntshungu wa vanhu va xona.

² N'wina Vaisraele, tsakelani Muvumbi wa n'wina, tlangelani Loyi a mi fumaka n'wina va le Siyoni.

³ Dzunisani vito ra yena hi ku cina, mi ri karhi mi n'wi chayela swingomana ni switende.

⁴ HOSI Xikwembu xi tsakela vanhu va xona, lava titsongahataka xi va hlulela valala.

⁵ Lava tshembaka Xikwembu a va yimbelele tinsimu va xi kurisa, a va be minkulungwana hambiloko byi ri vusiku.

⁶ A va tlakuse rito va xi tlangela, va hlomile matlhari.

⁷ Va ta fanela ku rihiseta leswi vamatiko va nga va endla swona, va tshinya vanhu lava.

⁸ Va ta khoma tihosi ta vamatiko va ti boha hi tinketani, va boha ni tindhuna ta kona hi tinsimbhi.

⁹ Va ta laya vamatiko valavo hilaha swi tsariweke hakona. Lava tshembaka HOSI Xikwembu, va ta kurisiwa hinkwavo hi ndlela yeleyo. Dzunisani HOSI!