Pisalema 148 - BIBELE Mahungu Lamanene

Swivumbiwa hinkwaswo a swi dzunise Xikwembu

¹ Dzunisani HOSI! Dzunisani HOSI Xikwembu, n'wina swivumbiwa swa le tilweni, xi dzuniseni eswivandleni swa le henhla-henhla.

² Xi dzuniseni n'wina hinkwenu tintsumi ta xona, n'wina hinkwenu mavandla ya xona, xi dzuniseni.

³ Wena dyambu na wena n'weti xi dzuniseni, xi dzuniseni n'wina hinkwenu tinyeleti leti vangamaka.

⁴ Xi dzuniseni n'wina matilo ya le henhla-henhla, kun'we na n'wina mati lama nge henhla matilweni.

⁵ Swilo leswi hinkwaswo a swi dzunise vito ra HOSI Xikwembu, hikuva swi tumbulukile hi ku lerisa ka xona,

⁶ xi swi vekile etindhawini ta swona leti nga hundzukiki, xi swi vekela milawu leyi swi tsandzekaka ku yi tlula.

⁷ Dzunisani HOSI Xikwembu, n'wina swivumbiwa swa laha misaveni, xi dzuniseni n'wina swiharhi leswikulu swa le lwandle na n'wina hinkwenu swidziva swa kona,

⁸ wena ndzilo na wena xihangu, wena gamboko na wena gwitsi, hambi a ri wena xidzedze, wena u endlaka ku rhandza ka xona.

⁹ Tintshava ni swintshabyana hinkwaswo, mirhi ya mihandzu na swona swihlahla,

¹⁰ swiharhi ni swifuwo hinkwaswo, swikokovi ni tinyanyana, hinkwaswo a swi dzunise HOSI Xikwembu.

¹¹ Xi dzuniseni n'wina tihosi ta la misaveni na n'wina hinkwenu mi akeke eka yona, n'wina tihosana na n'wina hinkwenu vafambisi,

¹² n'wina majaha na n'wina vanhwana, n'wina lavakulu na n'wina lavatsongo.

¹³ Hinkwenu, dzunisani HOSI Xikwembu, hikuva vito ra xona hi rona ntsena ri nga rikulu, ku dzuneka ka xona ku vonaka etilweni ni laha misaveni.

¹⁴ Xi tiyisile Vaisraele vanhu va xona, vona hinkwavo lava va xi tshembaka, kutani va tidzunisa ha swona, hikuva xi le kusuhi na vona. Dzunisani HOSI!