Pisalema 147 - BIBELE Mahungu Lamanene

Xikwembu xi fuma hinkwaswo

¹ Dzunisani HOSI! Ku dzunisa Xikwembu xa hina hi risimu a hi ku saseka! Swa tsakisa ku xi twarisa hilaha swi fanelaka hakona.

² HOSI Xikwembu xi le ku pfuxeni ka muti wa Yerusalema, xi hlengeleta Vaisraele lava hangalasiweke ematikweni.

³ Xi horisa lava vavisekaka timbilu, xi bohelela timbanga ta vona.

⁴ Hi xona xi pimaka nhlayo ya tinyeleti, hinkwato xi ti thya mavito

⁵ Xikwembu N'wini wa hina i xikulu, xi ni matimba ngopfu, vutlhari bya xona a byi pimeki.

⁶ Xi pfuxa lava xanisiwaka, kambe lavo homboloka xi va wisela hansi.

⁷ Yimbelelani mi tlangela HOSI Xikwembu xa hina, mi xi dzunisa hi swichaya-chayani.

⁸ Hi xona xi pfalaka tilo hi mapapa, xi nisa mpfula emisaveni, xi mirisa byanyi eswitsungeni.

⁹ Hi xona xi phamelaka swiharhi, xi phamela ni mavondlo ya mawukuwuku lama rilelaka swakudya.

¹⁰ A xi tsakisiwi hi ntamu wa tihanci, a xi na mhaka ni tinhenha leti tiyeke,

¹¹ kambe xi tsakela lava va xi chavaka, lava tshembaka rirhandzu ra xona.

¹² Tlangela HOSI we Yerusalema, we Siyoni dzunisa Xikwembu xa wena.

¹³ Hi xona lexi tiyisaka rirhangu ra wena, xi biyelela lava akeke ka wena.

¹⁴ Xi tisa ku rhula etikweni ra wena, xi ku phamela leswo nandziha u dya u xurha.

¹⁵ HOSI Xikwembu xo lerisa kunene laha misaveni, kutani ku hatla ku endliwa leswi xi swi vulaka.

¹⁶ Xi nisa gamboko ri basa ku fana ni voya bya tinyimpfu, xi haxa gwitsi kukotisa nkuma.

¹⁷ Hi xona xi nisaka ni xihangu xa maribye lamakulu, ku hava loyi a nga tiyelaka xirhami xa kona.

¹⁸ Xo vulavula kunene kutani swilo leswi swi n'oka; xi hungisa moya wa xona kutani mati ma khuluka.

¹⁹ HOSI Xikwembu xi tivisile va ka Yakobo erito ra xona, xi dyondzisa Vaisraele milawu ni swiboho swa xona.

²⁰ Vanhu va tinxaka timbe, a xi va endlelanga swilo leswi, a va tivi swiboho swa xona. Dzunisani HOSI!