Pisalema 145 - BIBELE Mahungu Lamanene

Ku fuma ka Xikwembu a ku na ku hela

Risimu ra Davhida ro dzunisa HOSI.

¹ We Xikwembu xanga, wena la fumaka, ndzi ta twarisa vukulu bya wena; minkarhi hinkwayo ndzi ta ku tlangela.

² Siku rin'wana ni rin'wana ndzi ta ku nkhensa, ndzi dzunisa vito ra wena hilaha ku nga heriki.

³ HOSI i Xikwembu lexikulu, xi dzuneka ngopfu; vukulu bya xona hi lebyi nga pimekiki.

⁴ Vanhu va nkarhi wa sweswi va ta byela lava va ha taka leswi u swi endleke, va ta va tivisa mintirho ya wena ya matimba.

⁵ Na mina ndzi nge tshiki ku anakanya ku saseka ni ku hlawuleka ka vuhosi bya wena, ndzi anakanya ni swiendlo swa wena leswo hlamarisa.

⁶ Mintirho ya wena leyo chavisa ya matimba, vanhu va ta yi twarisa, na mina ndzi ta vula vukulukumba bya wena.

⁷ Vanhu va ta vulavula hi vunene bya wena lebyikulu, va byi tsundzuka; va ta dzunisa ku lulama ka wena hi minkulungwana.

⁸ HOSI Xikwembu xi ni tintswalo, xi twela vanhu vusiwana, hi rirhandzu ra xona lerikulu xi va lehisela mbilu.

⁹ Swivumbiwa swa xona hinkwaswo xi swi hlayisa hi vunene ni tintswalo.

¹⁰ We HOSI, swivumbiwa swa wena hinkwaswo swi ta ku dzunisa, vahlawuriwa va wena hinkwavo va ta ku tlangela.

¹¹ Va ta vula ku dzuneka ka mfumo wa wena, va twarisa mintirho ya wena ya matimba.

¹² Hikokwalaho vanhu va ta tiva leswaku u ni ntamu, ni leswaku mfumo wa wena wu hlawulekile, wa dzuneka.

¹³ Vuhosi bya wena i bya minkarhi hinkwayo, u ta va mufumi hilaha ku nga heriki. [Marito hinkwawo ya HOSI Xikwembu ma ni ntiyiso, rirhandzu ra xona ra vonaka emintirhweni ya xona hinkwayo.]

¹⁴ HOSI Xikwembu xi pfuxa hinkwavo lava khunguvanyekeke, lava tshikeleriwaka xi va kutsula hinkwavo.

¹⁵ We HOSI, swivumbiwa hinkwaswo swi languta eka wena, kutani wa swi phamela enkarhini lowu faneleke.

¹⁶ U pfula xandla xa wena, kutani swivumbiwa hinkwaswo leswi hanyaka swi dya swi xurha.

¹⁷ Tindlela ta HOSI Xikwembu hi leto lulama hinkwato, rirhandzu ra xona ra vonaka emintirhweni ya xona hinkwayo.

¹⁸ HOSI Xikwembu xi le kusuhi ni hinkwavo lava va xi khongelaka, va nga lava va xi khongelaka hi mbilu hinkwayo.

¹⁹ Lava va xi chavaka, xi va endlela hi ku navela ka vona, loko va rila eka xona, xa va twa kutani xi va ponisa.

²⁰ HOSI Xikwembu xi hlayisa hinkwavo lava va xi rhandzaka, kambe xi ta herisa lavo homboloka hinkwavo.

²¹ Nomo wa mina a wu vule ku dzuneka ka HOSI Xikwembu, hinkwaswo leswi hanyaka a swi nkhense vito ra xona lero hlawuleka, namuntlha ni hilaha ku nga heriki.