Pisalema 144 - BIBELE Mahungu Lamanene

Xikhongelo xa murhangeri wa tiko

Pisalema ya Davhida.

¹ Ndza ku nkhensa HOSI, wena ribye ranga, wena la ndzi letelaka eku hlomeni ka matlhari, ni le ku lweni ka tinyimpi.

² U yima na mina, wa ndzi biyelela, eka mina u mulweri ni mukutsuri, u xitlhangu xa mina ni khokholo ranga wa ndzi pfuna ku fuma vanhu va mina.

³ We HOSI, xana munhu i ncini u kalaka u n'wi anakanya xana? Munhu wa nyama o va yini eka wena leswaku u tikarhatela yena xana?

⁴ Munhu ú fana ni moyanyana, vutomi bya yena byi hatla byi hundza tanihi ndzhutinyana.

⁵ Pfalula matilo ya wena we HOSI, u rhelela, khumba tintshava ti mbuluka musi.

⁶ Vangamisa rihati u hlongorisa valala, va cope hi miseve ya wena u va hangalasa.

⁷ Tshambuluta voko ra wena, u ndzi humesa exidziveni, u ndzi ponisa emavokweni ya vamatiko.

⁸ Vanhu lava va vulavula mavunwa ntsena; loko va tiboha hi ku tlakusa voko ra xinene, va le ku hembeni!

⁹ We Xikwembu, ndzi ta yimbelela risimu lerintshwa ndzi ku dzunisa, ndzi ta ku twarisa hi haripa ya khume ra tingoti,

¹⁰ ndzi ku: “Tihosi ti pfuniwa hi Xikwembu ku hlula valala va tona, hi xona lexi poniseke nandza wa xona Davhida.”

¹¹ We HOSI, ndzi sirhelele ematlharini lama ndzi xanisaka, u ndzi ponisa emavokweni ya vamatiko. Vanhu lava va vulavula mavunwa ntsena; loko va tiboha hi ku tlakusa voko ra xinene, va le ku hembeni!

¹² Vana va hina va xinuna a va fane ni mirhi leyi nga mila yi tiya ku sukela loko yi byariwile; vana va hina va xisati a va fane ni timhandze leti vatliweke ta yinhla, leti sasekisaka tindlu ta vuhosi.

¹³ Switlati swa hina a swi tlhemuke hi swakudya swa tinxaka-xaka. Tinyimpfu ta hina ni timbuti ta hina a ti andze emadyelweni hi madzana-dzana,

¹⁴ tihomu na tona ti dya ti nona. Ku ngheneriwa hi valala ni ku huma nyimpi a swi hele, vanhu va nga ha tlhavi mukhosi emagondzweni.

¹⁵ Ku katekile vanhu lava humelelaka hi ndlela leyi, ri katekile tiko leri HOSI yi nga Xikwembu xa rona!