Pisalema 143 - BIBELE Mahungu Lamanene

Xikhongelo xo kombela ku pfuniwa

Pisalema ya Davhida.

¹ We HOSI, yingisa xikhongelo xa mina, rhiya ndleve u twa xirilo xa mina. Wa tshembeka, ndzi hlamule hi ku lulama ka wena.

² U nga tshuki u ndzi avanyisa mina nandza wa wena: A ku na munhu na un'we la misaveni la nga riki na nandzu emahlweni ka wena.

³ Nala wa ndzi hlongorisa, a ndzi wisela hansi ni ku ndzi kandziyela, a ndzi susumetela exinyamini, ndzi fana ni lava feke khale.

⁴ Hikokwalaho mbilu ya mina yi hela ntamu, ndza titivala.

⁵ Ndzi anakanya minkarhi ya khale we HOSI, hinkwaswo leswi u swi endleke ndza swi tsundzuka, a ndzi rivali mintirho ya wena ya matimba.

⁶ Ndza ku khongela ndzi tlakusile mavoko, ndzi langutela ku pfuniwa hi wena ku fana ni misava leyi omeke leyi langutelaka mpfula.

⁷ We HOSI hatlisa u ndzi hlamula, hikuva ndzi karhele. U nga tshuki u ndzi fularhela, hikuva ndzi nga fana ni lava yaka eku feni.

⁸ Ndzi tsundzuxe rirhandzu ra wena mixo wun'wana ni wun'wana, hikuva eka wena ndzi hlayisekile. Ndzi kombe ndlela leyi ndzi fanelaka ku famba ha yona, hikuva ndzi tinyiketile eka wena.

⁹ We HOSI, ndzi kutsule emavokweni ya valala, ndzi tsutsumela eka wena, we xisirhelelo xanga.

¹⁰ Ndzi dyondzise ku endla leswi u swi tsakelaka, hikuva u Xikwembu xanga. Moya wa wena hi lowunene, a wu ndzi basisele tindlela.

¹¹ We HOSI, hlayisa vutomi bya mina hikwalaho ka vito ra wena; hi vunene bya wena, ndzi humese ekhombyeni.

¹² Leswi u ndzi rhandzaka, dlaya valala va mina, u herisa hinkwavo lava va ndzi xanisaka, hikuva ndzi nandza wa wena.