Pisalema 142 - BIBELE Mahungu Lamanene

Xikhongelo xa munhu la xanisekaka

Swiletelo swa Davhida loko a khongela a ri ebakweni.

¹ Ndzi tlakusa rito ndzi huwelela eka HOSI Xikwembu, ndzi kombela hi matimba leswaku xi ndzi pfuna.

² Ndzi tisa xirilo xa mina eka Xikwembu, ni ku xi tivisa hilaha ndzi xanisekaka hakona.

³ Loko ndzi hela matimba, we Xikwembu u tiva leswi swi ndzi humelelaka. Lomu ndzi yaka kona, va ringeta ku ndzi phasa hi ntlhamu.

⁴ Loko ndzi languta laha kusuhi na mina, a ndzi voni na munhu na un'we loyi a nga ndzi pfunaka. Ku hava laha ndzi nga tumbelaka kona, a ku na munhu loyi a tikarhatelaka mina

⁵ We HOSI, ndzi huwelela eka wena, ndzi ri: U khokholo ra mina. Ehandle ka wena a ndzi na lexi ndzi xi hanyelaka.

⁶ Rhiya ndleve u twa xirilo xa mina, hikuva ndzi tsongahatiwile ngopfu. Ndzi lamulele eka lava va ndzi hlongorisaka, hikuva va ndzi tlula hi matimba.

⁷ Ndzi humese ekhotsweni, leswaku ndzi tlhela ndzi ku tlangela. Lavo lulama va ta ndzi rhendzela va tsakile, hikuva u ta va u ndzi endlele leswinene.