Pisalema 141 - BIBELE Mahungu Lamanene

Xikhongelo xo kombela ku hluleriwa miringo

Pisalema ya Davhida.

¹ We HOSI, ndzi huwelela eka wena, hatlisa u ta eka mina, rhiya ndleve u yingisa loko ndzi ku vitana.

² Xikhongelo xa mina a xi fane ni mirhi ya risuna leyi hisiwaka emahlweni ka wena. Loko ndzi khongela ndzi tlakusile mavoko, a swi fane ni magandzelo lama humesiwaka nimadyambu.

³ We HOSI, veka mulanguteri enon'weni wa mina a rindza leswi ndzi swi vulaka.

⁴ U nga pfumeli leswaku miehleketo ya mina yi namarhela leswo biha, ndzi nga tshuki ndzi endla leswo homboloka, kumbe ku tirhisana ni vanhu lava dyohaka; ndzi nga tshuki ndzi dya na vona eminkhubyeni.

⁵ Loko munhu wo lulama a ndzi ba ni ku ndzi tshinya hi rirhandzu, eka mina i mafurha layo nun'hwela, ndzi nge ali ku cheriwa wona enhlokweni; kambe ndza ha ta khongela ndzi lwa ni mintirho ya lavo homboloka.

⁶ Siku varhangeri va vona va nga ta cukumetiwa ekheleni, va ta ndzi twa ndzi ku: “Va layekile!”

⁷ Marhambu ya vona ma ta hangalasiwa enyangweni ya xivandla xa vafi kukota ribye ra ku sila leri cukumetiwaka ehansi ri fayeka.

⁸ We HOSI N'wini wanga, ndzi languta eka wena, vutumbelo bya mina ndzi byi lava eka wena, u nga ndzi cukumeti!

⁹ Ndzi ponise eka xirimbana lexi va ndzi rhiyeke ha xona, u ndzi phonyokisa emintlhan'wini ya lava endlaka leswo biha.

¹⁰ Phasa lavo homboloka hi mintlhamu ya vona vinyi, mina u ndzi ponisa eka yona.