Pisalema 140 - BIBELE Mahungu Lamanene

Xikhongelo xo kombela ku lamuleriwa

Risimu ra Muyimbelerisi. Pisalema ya Davhida.

¹ We HOSI, ndzi lamulele eka vanhu lavo homboloka, u ndzi sirhelela eka lava nga ni tihanyi.

² Vanhu lava, va boha makungu layo biha, va le ku pfuxeni ka tinyimpi.

³ Marito ya vona ma tlhava kukota meno ya nyoka, ku vulavula ka vona ka dlaya ku fana ni vuxungu bya mhiri.

⁴ We HOSI, ndzi lamulele emavokweni ya lavo homboloka, u ndzi biyelela eka vanhu va tihanyi lava tsakelaka ku ndzi wisa.

⁵ Vanhu lava va manyunyu va ndzi tumbelerile va lava ku ndzi phasa, endleleni ya mina va rhiyile mintlhamu, va veka ni swirimbana.

⁶ We HOSI, ndzi vulavula na wena ndzi ri: U Xikwembu xa mina, rhiya ndleve u yingisa xirilo xa mina.

⁷ We HOSI N'wini wa hinkwaswo, wena mukutsuri wanga la nga ni matimba, u ndzi sirhelerile enkarhini wa nyimpi.

⁸ U nga pfumeli leswaku lavo homboloka va kuma leswi va swi navelaka; va nga tshuki va humelela emakungwini ya vona, hikuva va nga tshuka va tikukumuxa!

⁹ Endla leswaku marito layo biha ya lava va ndzi hembelaka, ma vuya hi vona.

¹⁰ A va wele hi makala lama vuvumelaka, va hoxiwa ekheleni ra ndzhope va nga ha humi!

¹¹ Lava hembelaka van'wana, a va herisiwe etikweni, vanhu va tihanyi a va hatlise va wela ekhombyeni.

¹² Ndza swi tiva leswaku HOSI Xikwembu xi yima ni lava xanisiwaka, xi avanyisela swisiwana timhaka ta swona hi ndlela yo lulama.

¹³ Ina, lavo lulama va ta twarisa vito ra wena, va ta tshama na wena minkarhi hinkwayo.