Pisalema 139 - BIBELE Mahungu Lamanene

Xikwembu xi kona hinkwako, xi tiva hinkwaswo

Risimu ra Muyimbelerisi. Pisalema ya Davhida.

¹ We HOSI, u ndzi kambisisile, wa ndzi tiva;

² loko ndzi tshamile kumbe ndzi yimile, wa swi tiva; makungu ya mina u ma vonile khale!

³ Hambi ndzi famba-famba kumbe ndzi etlela, ndzi le mavokweni ya wena; eka wena, mintirho ya mina hinkwayo yi le rivaleni.

⁴ Loko ndzi nga si vula nchumu we HOSI, u tiva mhaka ya kona hinkwayo.

⁵ U ndzi biyelerile matlhelo hinkwawo, ndzi le hansi ka voko ra wena.

⁶ Ndlela leyi u ndzi tivaka ha yona, ya ndzi hlamarisa, yi tlula ngopfu ku twisisa ka mina.

⁷ Xana moya wa wena ndzi nga wu balekela ndzi ya kwihi, ndzi nga ya tumbela kwihi laha wena u nga riki kona xana?

⁸ Loko ndzi tlhandlukela ematilweni, wena u kona, ni loko ndzi ya etlela exivandleni xa vafi, na kwalaho u kona!

⁹ Hambi ndzi nga haha ndzi ya evuxeni, kumbe ndzi ya tshama evupeladyambu,

¹⁰ voko ra wena ri ta ndzi khoma, ri nga ka ri nga ndzi tshiki.

¹¹ Hambiloko ndzi kombela xinyami ku ndzi funengeta, ni ku vonakala leswaku ku hundzuka vusiku byi ndzi fihla,

¹² xinyami xa kona xi ta nyamalala emahlweni ka wena, ni vusiku bya kona byi ta vangama kukota nhlekanhi. Eka wena, xinyami kumbe ku vonakala swa fana.

¹³ Hi wena u tumbuluxeke miri wa mina hinkwawo, u ndzi hlayisile ekhwirini ra manana.

¹⁴ Hikokwalaho ndza ku tlangela: U endlile leswo chavisa, kutani na mina ndzi xihlamariso. Mintirho ya wena hinkwayo ya hlamarisa, ndza swi tiva swinene.

¹⁵ A wu tiva marhambu ya mina hinkwawo loko ndzi ri karhi ndzi vumbiwa exihundleni, ndzi hlanganisiwa endzeni ka mana wa mina.

¹⁶ U ndzi vonile ndzi nga si va ni xivumbeko. Masiku lawa u nga ndzi lunghisela wona, u ma tsarile hinkwawo ebukwini ya wena na rin'we ra wona ri nga si va kona.

¹⁷ We Xikwembu, makungu ya wena ma ndzi tsakisa ngopfu, ntsengo wa wona i ntsandza-vahlayi;

¹⁸ ndzi nga ringeta ku ma hlaya, kambe ma tlula sava ra lwandle hi ku tala; hambiloko ndzi nga ma heta, wena ndzi nge ku twisisi!

¹⁹ We Xikwembu, vanhu lavo homboloka u ta va herisa rini ke? N'wina mi tsakelaka ku halata ngati, sukani mi ya kule na mina!

²⁰ We HOSI vanhu lava va le ku ku lumbeteni, va hlambanya hi mavunwa, hikuva i valala va wena.

²¹ Lava va ku vengaka, na mina ndzi va venga ngopfu, vanhu lava lwaka na wena, va ndzi vavisa mbilu.

²² Ndzi va venga ku tlula mpimo, hikuva i valala ni le ka mina.

²³ Ndzi kambisise we HOSI, u vona leswi nga mbilwini yanga. Ndzi kambele, kutani u ta tiva leswaku ndzi anakanya yini.

²⁴ Loko u vona leswaku ndzi le ku lahlekeni, ndzi vuyise endleleni leyi nga yona minkarhi hinkwayo.