Pisalema 138 - BIBELE Mahungu Lamanene

Risimu ro tlangela ku tshembeka ka Xikwembu

Pisalema ya Davhida.

¹ We HOSI, ndza ku tlangela hi mbilu ya mina hinkwayo, emahlweni ka swivumbiwa swa le tilweni.

² Ndzi nkhinsama emahlweni ka Tempele ya wena leyo hlawuleka, ndzi ri karhi ndzi tlangela vito ra wena, hikuva u ni rirhandzu, wa tshembeka; leswi u swi tirheke swi tlula hinkwaswo leswi a hi swi languterile eka wena.

³ Siku leri ndzi huweleleke eka wena, u ndzi hlamurile, u ndzi pfunile ndzi ko ndzi tiya swinene.

⁴ We HOSI, vafumi hinkwavo va misava a va ku tlangele, hikuva va twile leswi u swi vuleke.

⁵ A va dzunise matirhele ya wena hi risimu leri nge: “Ku dzuneka ka HOSI Xikwembu ku kurile ngopfu!

⁶ Hambileswi xi fumaka hinkwaswo, xi anakanya lava titsongahataka, kambe lava tikurisaka xi va vona va ha ri kule.”

⁷ Loko ndzi tikuma ndzi rhendzeriwe hi maxangu, wa ndzi biyelela we HOSI; ni loko valala va ndzi karihela, voko ra wena ra ndzi sirhelela ri ndzi lamulela.

⁸ We HOSI, u ta hetisa makungu ya wena lamanene ehenhla ka mina; rirhandzu ra wena a ri na ku hela, hikokwalaho ntirho lowu u wu sunguleke, u nga wu tshiki empfhukeni!