Pisalema 137 - BIBELE Mahungu Lamanene

Xirilo xa Vaisraele evukhumbini

¹ Etibuweni ta milambu ya le Babilona, a hi tshama hi ri karhi hi rila, loko hi tsundzuka muti wa Siyoni.

² A hi hayekile tiharipa ta hina emarhavini ya mirhi ya minengenedzi.

³ Etindhawini teto, lava va hi yiseke evukhumbini, vona vaxanisi va hina, a va lava leswaku hi va tsakisa hi tinsimu, va hi lerisa va ku: “Yimbelelani, mi hi chayela rin'wana ra tinsimu ta le Siyoni!”

⁴ Xana hi nga yimbelerisa ku yini tinsimu ta HOSI, leswi hi nga tikweni ra van'wana vanhu xana?

⁵ We Yerusalema, loko ndzo tshuka ndzi ku rivarile, voko ra mina ra xinene a ri khwanyale!

⁶ Loko ndzi nga ku tsundzuki we Yerusalema, ni loko ndzi nga ku tsakeli ku tlula hinkwaswo, swi nga antswa ndzi hundzuka mbheveve!

⁷ We HOSI, u nga tshuki u rivala leswi vanhu va le Edomu va swi vuleke, siku muti wa Yerusalema wu hlaseriweke. Va huwelerile va ku: “Fayani! Fayani muti lowu, mi faya ni masungulo ya wona!”

⁸ Na wena muti wa Babilona, u le kusuhi ni ku hlaseriwa. A ku nkhensiwe loyi a nga ta rihisela eka wena, a ku tlherisela leswo biha leswi u nga hi endla swona.

⁹ A ku nkhensiwe loyi a nga ta khoma swihlangi swa wena, a swi phyandlasela emaribyeni!