Pisalema 136 - BIBELE Mahungu Lamanene

Risimu ro tlangela rirhandzu ra Xikwembu

¹ Tlangelani HOSI, hikuva yi ni vunene! — Rirhandzu ra yona hi leri nga heriki —

² Tlangelani Xikwembu lexikulu ngopfu! — Rirhandzu ra xona hi leri nga heriki —

³ Tlangelani yena N'wini wa hinkwaswo! — Rirhandzu ra yena hi leri nga heriki —

⁴ Ú endle swihlamariso leswikulu a ri yexe. — Rirhandzu ra yena hi leri nga heriki —

⁵ Ú vumbe matilo hi vutlhari. — Rirhandzu ra yena hi leri nga heriki —

⁶ Ú andlarile misava ehenhla ka mati. — Rirhandzu ra yena hi leri nga heriki —

⁷ Hi yena la endleke timboni letikulu ta le tilweni. — Rirhandzu ra yena hi leri nga heriki —

⁸ Ú endle dyambu ku fuma nhlekanhi, — Rirhandzu ra yena hi leri nga heriki —

⁹ a endla n'weti ni tinyeleti ku fuma vusiku. — Rirhandzu ra yena hi leri nga heriki —

¹⁰ Hi yena la dlayeke mativula ya Vaegipta. — Rirhandzu ra yena hi leri nga heriki —

¹¹ Ú humesile Vaisraele etikweni ra Egipta, — Rirhandzu ra yena hi leri nga heriki —

¹² a va kutsula hi ntamu lowukulu ni mintirho ya matimba. — Rirhandzu ra yena hi leri nga heriki —

¹³ Ú avanisile mati ya Lwandle-ro-Tshwuka ma endla tindhundhuma, — Rirhandzu ra yena hi leri nga heriki —

¹⁴ kutani Vaisraele va tsemakanya hi le xikarhi, — Rirhandzu ra yena hi leri nga heriki —

¹⁵ a tshika mati ma khubumeta Faro ni mavuthu ya yena. — Rirhandzu ra yena hi leri nga heriki —

¹⁶ Ú fambisile vanhu va yena emananga, — Rirhandzu ra yena hi leri nga heriki —

¹⁷ a dlaya tihosi leta matimba, — Rirhandzu ra yena hi leri nga heriki —

¹⁸ a dlaya ni leto tiveka ngopfu, — Rirhandzu ra yena hi leri nga heriki —

¹⁹ va nga va Sihoni hosi ya Vaamori, — Rirhandzu ra yena hi leri nga heriki —

²⁰ na Ogo hosi ya le Baxani. — Rirhandzu ra yena hi leri nga heriki —

²¹ Kutani a teka tiko ra vona a ri nyika Vaisraele, — Rirhandzu ra yena hi leri nga heriki —

²² a ri nyika wona malandza ya yena ri va ra wona. — Rirhandzu ra yena hi leri nga heriki —

²³ Hi yena la hi voneke loko hi xaniseka, — Rirhandzu ra yena hi leri nga heriki —

²⁴ kutani a hi lamulela eka valala va hina. — Rirhandzu ra yena hi leri nga heriki —

²⁵ Swivumbiwa hinkwaswo swi phamela hi yena. — Rirhandzu ra yena hi leri nga heriki —

²⁶ Tlangelani Xikwembu xa matilo! — Rirhandzu ra xona hi leri nga heriki —