Pisalema 135 - BIBELE Mahungu Lamanene

Vukulu bya Xikwembu bya dzuneka

¹ Dzunisani HOSI! Dzunisani vito ra HOSI Xikwembu, xi dzuniseni n'wina malandza ya xona,

² n'wina mi xi tirhelaka endlwini ya xona, eswivaveni swa Tempele ya xona Xikwembu xa hina.

³ Dzunisani HOSI Xikwembu, hikuva xi ni vunene, yimbelelani mi twarisa vito ra xona, hikuva xi rhandzeka ngopfu.

⁴ HOSI Xikwembu xi tihlawulele Vaisraele, vona va ka Yakobo, leswaku va va vanhu va xona va xiviri.

⁵ Ndza swi tiva hakunene leswaku HOSI i Xikwembu lexikulu, N'wini wa hina ú tlula swikwembu hinkwaswo hi vukulu.

⁶ HOSI Xikwembu xi tiendlela hinkwaswo hi ku rhandza ematilweni ni laha misaveni, emalwandle ni le swidziveni hinkwaswo.

⁷ Hi xona xi tisaka mapapa ma huma evugimamusi, xi dzindzisa tilo, mpfula yi na, xi hungisa bubutsa ri huma evuhlayiselweni bya xona.

⁸ Hi xona xi dlayeke mativula ya vanhu ni ya swifuwo etikweni ra Egipta.

⁹ N'wina Vaegipta, HOSI Xikwembu xi bile hosi ya n'wina Faro ni malandza ya yena hinkwawo, hi mahlori ni swihlamariso.

¹⁰ Xi bile vanhu va matiko layo tala, xi herisa tihosi ta vona leta matimba,

¹¹ va nga va Sihoni hosi ya Vaamori, na Ogo hosi ya le Baxani, ni vafumi hinkwavo va le Kanana;

¹² tiko ra vona xi ri nyikile Vaisraele vanhu va xona, leswaku ri va ra vona.

¹³ We HOSI, vito wena ri ta twakala hilaha ku nga heriki, vanhu va ta ku tsundzuka minkarhi hinkwayo.

¹⁴ Hakunene HOSI Xikwembu xi lwela vanhu va xona, malandza ya xona xi ma twela vusiwana.

¹⁵ Swikwembu swa vamatiko swi lo endliwa hi vanhu, i nsuku ni silivhere ntsena.

¹⁶ Milomo swi na yona, kambe a swi vulavuli, swi ni mahlo, kambe a swi voni.

¹⁷ Swi ni tindleve, kambe a swi twi, hambi ku ri ku hefemula a swi hefemuli.

¹⁸ Lava va swi vumbeke ni hinkwavo lava va swi tshembaka, a va fane na swona!

¹⁹ N'wina Vaisraele, nkhensani HOSI Xikwembu, xi nkhenseni n'wina va ka Aroni!

²⁰ N'wina va ka Levhi, nkhensani HOSI Xikwembu, xi nkhenseni n'wina mi xi chavaka!

²¹ N'wina mi akeke eSiyoni, nkhensani HOSI Xikwembu, xona xi tshamaka eYerusalema. Dzunisani HOSI!