Pisalema 134 - BIBELE Mahungu Lamanene

Tlangelani HOSI!

Risimu ra lava teke enkhubyeni eYerusalema.

¹ N'wina hinkwenu malandza ya HOSI, tanani mi ta yi tlangela, tanani n'wina mi rindzaka nivusiku eTempeleni ya yona.

² Tlakusani mavoko ya n'wina ma langutana ni xivandla lexo hlawuleka, mi ri karhi mi tlangela HOSI.

³ HOSI Xikwembu, xona xi endleke tilo ni misava, a xi mi katekise xi ri eSiyoni.