Pisalema 132 - BIBELE Mahungu Lamanene

Xikwembu a xi katekise muti wa Siyoni

Risimu ra lava teke enkhubyeni eYerusalema.

¹ We HOSI, u nga rivali Davhida, ni hilaha a tikarhateke hakona,

² hikuva ú tibohile eka wena hi ku hlambanya, wena Xikwembu lexi nga ntamu wa va ka Yakobo,

³ a ku: “A ndzi nga ngheni ndlwini, ni ku etlela a ndzi nga etleli,

⁴ a ndzi nga pfumeli ku khomiwa hi vurhongo, ndzi nga ka ndzi nga khudzeheri,

⁵ ndzi ko ndzi kuma ndhawu leyi HOSI Xikwembu lexi nga ntamu wa va ka Yakobo xi nga ta kuma vutshamo eka yona.”

⁶ Hi twile leswaku Areka ya Ntwanano yi le Efrata, kutani hi yile hi ya yi kuma kusuhi ni muti wa Yaare,

⁷ kutani hi ku: A hi ngheneni endlwini leyi HOSI Xikwembu xi tshamaka eka yona, hi nkhinsama emahlweni ka xona hi xi gandzela.

⁸ We HOSI, tana hi Areka leyi ntamu wa wena wu tikombaka ha yona, u nghena na yona ekaya ka wena.

⁹ Nyika vaprista va wena matimba yo lwela vanhu; lava va ku tshembaka a va tsake va ba nkulungwana.

¹⁰ Leswi u rhandzeke Davhida nandza wa wena, u nga fularheli loyi u n'wi vekeke evuhosini.

¹¹ HOSI Xikwembu xi nga ka xi nga tlheleli ndzhaku; xi hlambanyele Davhida xi tiyisa xi ku: “Ndzi ta veka un'wana wa vana va wena exiluvelweni xa vuhosi.

¹² Loko vana va wena va hlayisa ntwanano wa mina, va nga rivali ni leswi ndzi nga ta va dyondzisa swona, na vona vatukulu va wena va ta kuma vuhosi byebyo, byi va bya vona hilaha ku nga heriki.”

¹³ Hakunene HOSI Xikwembu xi tihlawulerile muti wa Siyoni, xi tsakela ku tshama eka wona.

¹⁴ Xi ri: “Laha hi kona ndzi nga ta tshama ndzi wisa minkarhi hinkwayo, hikuva ndza ku tsakela.

¹⁵ Muti lowu ndzi ta wu katekisa ngopfu ndzi wu nyika swakudya, swisiwana leswi nga ka wona swi ta dya swi xurha.

¹⁶ Vaprista va wona ndzi ta va nyika matimba yo lamulela van'wana, kutani vaaki va wona lava va ndzi tirhelaka va ta tsaka va ba nkulungwana.

¹⁷ Ndzi ta tiyisa kona vuhosi bya Davhida, ndzi vona leswaku muhlawuriwa wa mina a nga tekeriwi byona.

¹⁸ Valala va yena ndzi ta va khomisa tingana, kutani vuhosi bya yena byi ta kula byi ndlandlamuka.”