Pisalema 130 - BIBELE Mahungu Lamanene

Xikhongelo xa munhu la nga khombyeni lerikulu

Risimu ra lava teke enkhubyeni eYerusalema.

¹ We HOSI, ndzi huwelela eka wena ndzi ri ekheleni leri enteke; ndzi yingise, we N'wini wanga.

² Rhiya ndleve u amukela xirilo xa mina, loko ndzi kombela ku pfuniwa!

³ We HOSI, loko onge wa hi hlayela swidyoho swa hina, xana i mani loyi a nga tiyelaka ku yima emahlweni ka wena we N'wini wa hina xana?

⁴ Kambe hi wena la hi rivalelaka, we HOSI. Hikokwalaho vanhu a va ku kombe xichavo.

⁵ Ndzi tshemba HOSI hi mbilu ya mina hinkwayo, ndzi yimela ku twa rito ra yona.

⁶ Ndzi langutela N'wini wa hinkwaswo ku tlula valanguteri nivusiku loko va langutela vurhonga, ina, ku tlula valanguteri lava langutelaka vurhonga!

⁷ N'wina Vaisraele, langutelani HOSI, hikuva rirhandzu ra yona ra tshembeka, naswona yi hi kutsurile ko tala.

⁸ Ya ha ri yona leyi nga ta mi kutsula eswidyohweni swa n'wina hinkwaswo.