Pisalema 13 - BIBELE Mahungu Lamanene

Xikhongelo xo kombela ku humesiwa ekhombyeni

Risimu ra Muyimbelerisi. Pisalema ya Davhida.

¹ We HOSI, xana u ta ndzi rivala ku fikela rini xana? Ku ta va hilaha ku nga heriki ke? U ta ndzi fularhela ku fikela rini xana?

² Xana ndzi ta va ni gome emoyeni ku fikela rini, ni nhlomulo lowu ndzi nga na wona embilwini masiku hinkwawo wu ta hela rini xana? Xana valala va mina va ta tidzunisa hi ku va ehenhla ka mina ku fikela rini xana?

³ We HOSI Xikwembu xanga, languta u ndzi hlamula; sivela mahlo ya mina ku khomiwa hi vurhongo bya rifu,

⁴ leswaku nala wa mina a nga tshuki a ku: “Ndzi n'wi hlurile.” Hambi va ri lava lwaka na mina, va nga tshuki va tsakisiwa hi ku khuguka ka mina.

⁵ Kambe mina ndzi tshembile tintswalo ta wena leto tshembeka, mbilu ya mina yi ta tsaka hikuva u ta ndzi ponisa.

⁶ Ndzi ta yimbelela ndzi dzunisa HOSI, hikuva yi ndzi endlerile leswinene.