Pisalema 128 - BIBELE Mahungu Lamanene

Ku kateka ka lava chavaka Xikwembu

Risimu ra lava teke enkhubyeni eYerusalema.

¹ Ku katekile munhu un'wana ni un'wana loyi a chavaka HOSI Xikwembu, la fambaka etindleleni ta xona.

² Na wena u ta dya leswi u swi tirheke, swi ta ku tsakisa u va u kateka.

³ Emutini wa wena, nsati wa wena ú ta fana ni murhi wa vhinya lowu vekaka mihandzu leyo tala. Vana va wena va xinuna va ta fana ni swihluke swa murhi wa mutlhwari, loko va tshama na wena eswakudyeni.

⁴ Hakunene munhu la chavaka HOSI Xikwembu ú ta kateka hi ndlela yoleyo.

⁵ HOSI Xikwembu a xi ku katekise xi ri eSiyoni, u vona ku kateka ka Yerusalema masiku hinkwawo ya ku hanya ka wena.

⁶ Mayana ku hanya u vona vatukulu ni vatukulu-xinguwe! Ku rhula a ku ve na Vaisraele!