Pisalema 127 - BIBELE Mahungu Lamanene

Minkateko hinkwayo yi huma eka Xikwembu

Risimu ra lava teke enkhubyeni eYerusalema. Pisalema ya Solomoni.

¹ Loko yindlu yi nga akiwi hi HOSI, ntirho wa vaaki a wu pfuni nchumu. Loko muti wu nga rindziwi hi HOSI, valanguteri va rindzela mahala.

² A swi pfuni nchumu ku hubuta u tirha, u titsona ni vurhongo nimadyambu, u xanisekela ku kuma swakudya, hikuva HOSI Xikwembu xi nyika lava xi va rhandzaka, hambiloko va etlele.

³ Vana va xinuna i nyiko yo huma eka HOSI, hakunene ku va ni vana i nkateko.

⁴ Vana va xinuna lava munhu a va kumaka loko a ha tiyile, va fana ni miseve evokweni ra nhenha:

⁵ Ku katekile wanuna loyi nkotloto wa yena wu taleke hi miseve ya kona. Vanhu vo tano va nge chavi nchumu, loko va kanetana ni valala ehubyeni.