Pisalema 126 - BIBELE Mahungu Lamanene

Swirilo swi ta hundzuka ntsako

Risimu ra lava teke enkhubyeni eYerusalema.

¹ Siku HOSI Xikwembu xi tlheleke xi hi katekisa hina va le Siyoni, a hi ku hi le ku lorheni!

² A hi tsakile swinene hi ba minkulungwana, vamatiko va kondza va ku: “HOSI Xikwembu xi va endlerile leswikulu!”

³ Hakunene HOSI Xikwembu xi hi endlerile leswikulu, kutani hi tsakile ngopfu.

⁴ We HOSI, tlhela u hi katekisa, hi fana ni milambu leyi khulukaka emananga.

⁵ Lava byalaka va ri karhi va khavaxela mihloti, va ta tshovela va tsakile ngopfu.

⁶ Loyi a fambaka a ri eku rileni a rhwele mbewu yo ya byala, ú ta vuya a ri karhi a ba nkulungwana a rhwele ntshovelo wa yena.