Pisalema 125 - BIBELE Mahungu Lamanene

Xikwembu i xisirhelelo eka vanhu va xona

Risimu ra lava teke enkhubyeni eYerusalema.

¹ Lava tshembaka HOSI Xikwembu, va fana ni ntshava ya Siyoni, leyi nga tsekatsekiki, leyi tiyeke hilaha ku nga heriki.

² Tanihi tintshava leti rhendzelaka muti wa Yerusalema, HOSI Xikwembu xi rhendzele vanhu va xona sweswi ni masiku hinkwawo.

³ Lavo homboloka va nga ka va nga yi emahlweni va fuma tiko leri nyikiweke lavo lulama; ehandle ka swona, lavo lulama lava va nga tshuka va ringiwa va endla leswo biha.

⁴ We HOSI, katekisa vanhu lavo lulama, lava navelaka hi mbilu hinkwayo ku endla leswinene.

⁵ Kambe lava fambaka hi tindlela leto homboloka, va hlongole we HOSI swin'we ni lava endlaka leswo biha. Ku rhula a ku ve na Vaisraele!