Pisalema 124 - BIBELE Mahungu Lamanene

Xikwembu xi yima ni vanhu va xona

Risimu ra lava teke enkhubyeni eYerusalema. Pisalema ya Davhida.

¹ Loko HOSI a yi nga yimanga na hina, a ku ta va ku humelele yini? N'wina Vaisraele, vulani sweswo mi ku:

² “Loko HOSI a yi nga yimanga na hina, enkarhini lowu vanhu a va hi pfukerile,

³ ingi va hi mitile hi ri karhi hi hanya, eku hlundzukeni ka vona lokukulu.

⁴ A hi ta va hi dyiwile hi mati, hi khukhuriwa hi milambu leyi hobomulanaka.

⁵ Mati layo tala a ma ta va ma hi khubumetile.”

⁶ A ku nkhensiwe HOSI Xikwembu, hikuva a xi hi tshikanga hi hluriwa hi valala va hina.

⁷ Hi chupukile tanihi nyanyana leyi phonyokeke entlhan'wini wa varhiyi. Xirimbana xa vona xi hi hupile, kutani hi ponile!

⁸ Ku pfuniwa ka hina ku le vitweni ra HOSI, leyi endleke tilo ni misava.