Pisalema 123 - BIBELE Mahungu Lamanene

Xikhongelo xo kombela ku tweriwa vusiwana

Risimu ra lava teke enkhubyeni eYerusalema.

¹ Ndzi languta eka wena, wena la fumaka a ri ematilweni.

² Malandza ya xinuna ni ya xisati a ma tshiki ku languta eka vinyi va wona. Hi mukhuva wolowo na hina a hi tshiki ku languta eka HOSI Xikwembu xa hina, xi kondza xi hi twela vusiwana.

³ Hi twele vusiwana we HOSI, u hi tsetselela, hikuva hi soriwile ku tlula mpimo.

⁴ I khale hi ri karhi hi dyisiwa mbitsi, hi sandziwa hi lava va nga tshamiseka, va nga va manyunyu lava va hi langutelaka ehansi.