Pisalema 122 - BIBELE Mahungu Lamanene

Ku navelela Yerusalema eku rhula

Risimu ra lava teke enkhubyeni eYerusalema. Pisalema ya Davhida.

¹ Ndzi tsakile ngopfu loko va ndzi rhambile va ku: “A hi yeni endlwini ya HOSI!”

² We Yerusalema, sweswi hi fikile, hi nghenile eka wena.

³ Yerusalema i muti lowu akiweke wu tiya, wu rhendzeriwa hi rirhangu.

⁴ Hi kona tinxaka ta HOSI ti tlhandlukelaka kona ku ya yi tlangela, hilaha Vaisraele va lerisiweke hakona.

⁵ Hi kona laha murhangeri wa tiko, yena munhu wa ka Davhida, a avanyisaka timhaka a ri kona.

⁶ Khongelelani muti wa Yerusalema, mi wu kombelela ku rhula mi ku: “Lava va ku rhandzaka a va kume ku tsaka!”

⁷ Ku rhula a ku ve kona endzeni ka rirhangu ra wena, ni ku hlayiseka etindlwini ta wena ta vuhosi.

⁸ Hikwalaho ka vamakwerhu ni vanakulorhi, ndzi ta ku: “Ku rhula a ku ve na wena Yerusalema!”

⁹ Leswi yindlu ya HOSI Xikwembu xa hina yi nga laha ka wena, ndzi ku navelela minkateko.