Pisalema 121 - BIBELE Mahungu Lamanene

Xikwembu i muhlayisi

Risimu ra lava teke enkhubyeni eYerusalema.

¹ Ndzi languta henhla etintshaveni. Ku pfuniwa ka mina ku ta huma kwihi?

² Ku pfuniwa ka mina ku ta huma eka HOSI, Muendli wa tilo ni misava.

³ Muhlayisi wa wena a nge khudzeheri, a nge pfumeri leswaku u rheta u wa.

⁴ Hakunene a nga khudzeheri muhlayisi wa Israele, ni ku etlela a nga etleri.

⁵ HOSI Xikwembu xi ta ku hlayisa, xi ta va kusuhi na wena xi ku lwela.

⁶ Ninhlekanhi a wu nga tshwi hi dyambu, hambi wu ri n'weti nivusiku a wu nga ku endli nchumu.

⁷ HOSI yi ta ku ponisa emakhombyeni hinkwawo, yi ku sirhelela.

⁸ Sweswi ni masiku hinkwawo HOSI yi ta ku hlayisa eku sukeni ka wena, ni ku ya fika laha u yaka kona.