Pisalema 12 - BIBELE Mahungu Lamanene

Xikhongelo xa loyi a tshembaka nomo wa Xikwembu

Risimu ra Muyimbelerisi, leri hlaveleriwaka hi swichaya-chayani swa tingoti ta 8. Pisalema ya Davhida.

¹ Hi pfune, we HOSI, hikuva vanhu va vukhongeri va herile; lavo tshembeka exikarhi ka vanhu va nyamalarile.

² Hinkwavo ka vona, va byelana mavunwa; va kanganyisa hi ku vulavula swo tsakisa, kasi i vanhu va milomo mimbirhi.

³ We HOSI, va tseme milomo vakanganyisi lava hinkwavo, vona lava tikukumuxaka ngopfu,

⁴ va ku: “Hi ta hlula hi milomo ya hina, ku vulavula, ha swi kota, i mani a nga hi fumaka xana?”

⁵ HOSI yi ri: “Sweswi ndzi ta suka ndzi yima, hikuva swisiwana swi tekeriwa swilo swa swona, ni vapfumari va le ku konyeni. Vanhu lava nyefuriwaka, ndzi ta va nghenisa eku hlayisekeni.”

⁶ Marito ya HOSI ma tengile, ma fana ni silivhere leyi tengisiweke hi ku swekiwa ka 7 embiteni leyi celeriweke ehansi.

⁷ We HOSI, hi sirhelele, hi lwele minkarhi hinkwayo eka vanhu va manguva lawa,

⁸ hikuva lavo homboloka va rhendzeleka hinkwako, vubihi byi ri karhi byi dzunisiwa hi vanhu va laha misaveni.