Pisalema 119 - BIBELE Mahungu Lamanene

Risimu ro dzunisa Nawu wa Xikwembu 1

¹ Ku katekile vanhu lava mahanyelo ya vona ma tengeke, lava landzaka nawu wa HOSI.

² Ku katekile lava amukelaka switsundzuxo swa HOSI, va yingisa yona hi mbilu hinkwayo,

³ va nga lava chavaka ku endla leswo biha, lava fambaka etindleleni ta yona.

⁴ We HOSI, u lerisile vanhu leswaku va hlayisa swinene swiletelo swa wena.

⁵ Ndzi navela ngopfu ku hanya hi ndlela yo tshembeka, ndzi ri karhi ndzi hlayisa milawu ya wena.

⁶ Loko ndzi landzelela swileriso swa wena, a ndzi nga khomiwi hi tingana.

⁷ Ndzi ta dyondza leswi u swi boheke eku lulameni ka wena, ndzi ku tlangela hi mbilu yo basa.

⁸ Ndzi lava ku hlayisa milawu ya wena. U nga ndzi tshiki ni siku ni rin'we!

2

⁹ Xana munhu lontshwa a nga hanya hi mukhuva wihi, loko a lava ku famba endleleni leyo tenga xana? Hi loko a landzelela leswi u swi vulaka.

¹⁰ Ndzi lava ku ku yingisa hi mbilu ya mina hinkwayo, u nga pfumeli leswaku ndzi hambana ni swileriso swa wena.

¹¹ Leswi u swi vulaka, ndzi swi veka eku enteni ka mbilu yanga, leswaku ndzi nga ku dyoheli.

¹² We HOSI, vanhu a va tlangele wena! Hambi a ri mina, ndzi dyondzise milawu ya wena.

¹³ Minkarhi hinkwayo, ndzi lava ku byela van'wana hinkwaswo leswi u swi boheke loko u vulavula.

¹⁴ Ku hanya hi switsundzuxo swa wena swa ndzi tsakisa, swi fana ni loko ndzi thumbha xuma lexo tala.

¹⁵ Ndzi ta anakanya swiletelo swa wena, ndzi langutisisa ni tindlela ta wena.

¹⁶ Ku yingisa milawu ya wena, eka mina i ntsako lowukulu, a ndzi nga rivali marito ya wena.

3

¹⁷ We HOSI, ndzi nandza wa wena, ndzi katekise, leswaku ndzi ta hanya ndzi ri karhi ndzi yingisa rito ra wena.

¹⁸ Ndzi pfule mahlo, ndzi ta vona swihlamariso leswi nga nawini wa wena.

¹⁹ Laha misaveni, ndzo va muhundzi ntsena, u nga ndzi fihleri swileriso swa wena.

²⁰ Minkarhi hinkwayo ndzi navela ngopfu ku tiva leswi u swi boheke.

²¹ U tshinya vanhu lava titshembaka ngopfu, lava tivangelaka khombo hi ku tshika swileriso swa wena.

²² Ndzi ponise loko va ndzi sola ni ku ndzi hlekula, hikuva ndzi landzelela switsundzuxo swa wena.

²³ Hambiloko varhangeri va tiko va ndzi lumbeta ehubyeni, mina nandza wa wena a ndzi rivali milawu ya wena.

²⁴ Ndzi tsakela ngopfu switsundzuxo swa wena, ndzi fambisiwa hi swona.

4

²⁵ We HOSI, ndzi wele entshurini! Ndzi pfuxe hilaha u tshembiseke hakona.

²⁶ Ndzi ku boxerile timhaka ta mina, kutani u ndzi hlamurile; ndzi dyondzise milawu ya wena.

²⁷ Ndzi pfune ku twisisa swiletelo swa wena, leswaku ndzi ta anakanya mintirho ya wena leyo hlamarisa.

²⁸ Nhlomulo wu ndzi pfumata vurhongo; ndzi tiyise, hilaha u ndzi tshembiseke hakona.

²⁹ Ndzi fambise kule ni vanhu vo hemba, u ndzi pfuna ku hanya hi nawu wa wena.

³⁰ Ndzi hlawurile ku tiyisela endleleni ya wena, ndzi nga hambani ni leswi u swi boheke.

³¹ Switsundzuxo swa wena a swi suki eka mina; we HOSI u nga pfumeli leswaku ndzi khomiwa hi tingana.

³² Ndzi hisekela ku endla leswi u ndzi lerisaka swona, hikuva ha swona u anamisa miehleketo ya mina.

5

³³ We HOSI, ndzi dyondzise ku hanya hi milawu ya wena, kutani ndzi ta yi hlayisa minkarhi hinkwayo.

³⁴ Ndzi nyike ku twisisa nawu wa wena, ndzi wu landza hi mbilu ya mina hinkwayo.

³⁵ Ndzi fambise entileni wa swileriso swa wena, hikuva hi wona wu ndzi tsakisaka.

³⁶ Ndzi susumete ku anakanya switsundzuxo swa wena, ku tlula ku navela rifuwo.

³⁷ Ndzi pfune ku fularhela swilo swa hava, ndzi ta kuma vutomi etindleleni ta wena.

³⁸ Hetisa leswi u ndzi tshembiseke swona mina nandza wa wena, hikuva i swa lava va ku chavaka.

³⁹ Ndzi lamulele eka vasandzi, hikuva va ndzi chavisa; leswi pfunaka i swiletelo swa wena ntsena.

⁴⁰ Vona, ndzi navela ngopfu swiletelo swa wena; ponisa vutomi bya mina, hikuva u Xikwembu lexi lulameke.

6

⁴¹ We HOSI, ndzi kombe rirhandzu ra wena, u ndzi kutsula hilaha u tshembiseke hakona,

⁴² ndzi ta kota ku hlamula lava va ndzi monyaka, hikuva ndzi tshemba rito ra wena.

⁴³ U nga pfumeli ni siku ni rin'we leswaku ndzi vulavula mavunwa, hikuva ndzi tshemba leswi u swi boheke.

⁴⁴ Vutomi bya mina hinkwabyo, ndzi ta hlayisa nawu wa wena.

⁴⁵ Ndzi ta hanya ndzi ntshunxekile, hikuva ndzi ta va ndzi landzile swiletelo swa wena.

⁴⁶ Switsundzuxo swa wena, ndzi ta swi vula emahlweni ka tihosi ndzi nga ri na tingana.

⁴⁷ Ndzi tsakisiwa ngopfu hi swileriso swa wena, hikuva ndza swi rhandza;

⁴⁸ swileriso swa wena leswi ndzi swi rhandzaka, ndza swi xixima; a ndzi nga rivali milawu ya wena.

7

⁴⁹ Anakanya leswi u ndzi byeleke swona mina nandza wa wena, ma nga marito lawa ya ndzi nyikaka ku tshemba.

⁵⁰ Loko ndzi ri nhlomulweni, ndza chaveleleka, hikuva switshembiso swa wena swi ndzi nyika vutomi.

⁵¹ Vasandzi va ndzi hlekula ku tlula mpimo, kambe a ndzi hambani ni nawu wa wena.

⁵² We HOSI, ndzi kuma matimba, loko ndzi anakanya leswi u swi boheke khale.

⁵³ Lavo homboloka va ndzi hlundzukisa ngopfu, hikuva a va na mhaka ni nawu wa wena.

⁵⁴ Loko ndza ha ri emisaveni leyi, ndzi ta yimbelela tinsimu ndzi dzunisa milawu ya wena.

⁵⁵ We HOSI, ndza ku anakanya hambi byi ri vusiku, ndzi hlayisa nawu wa wena.

⁵⁶ Eka mina, ku landza swiletelo swa wena, hi byona vutomi.

8

⁵⁷ We HOSI, mina ndzi ri, nkateko wa mina i ku hlayisa rito ra wena.

⁵⁸ Ndza ku kombela hi mbilu ya mina hinkwayo: Ndzi twele vusiwana hilaha u tshembiseke hakona.

⁵⁹ Ndzi xiyaxiyile tindlela ta mina, kutani ndzi hundzulukile ndzi landzelela switsundzuxo swa wena.

⁶⁰ A ndzi hlweli, ndzi tsutsumela ku hlayisa swileriso swa wena.

⁶¹ Lavo homboloka va ndzi rhiya hi ntlhamu, kambe mina a ndzi rivali nawu wa wena.

⁶² Ni le xikarhi ka vusiku, ndza pfuka ndzi ku tlangela, hikwalaho ka leswo lulama leswi u swi boheke.

⁶³ Ndzi twanana ni hinkwavo lava va ku chavaka, lava hlayisaka swiletelo swa wena.

⁶⁴ We HOSI, misava yi tele hi rirhandzu ra wena, ndzi dyondzise milawu ya wena!

9

⁶⁵ We HOSI, u ndzi endlerile leswinene, mina nandza wa wena, hilaha u ndzi tshembiseke hakona.

⁶⁶ Ndzi dyondzise ku tiva ni ku twisisa swinene swileriso swa wena, hikuva ndzi tshemba wena.

⁶⁷ Khale loko ndzi nga si wela ekhombyeni, a ndzi lahlekile ndlela, kambe sweswi ndzi endla leswi u ndzi byelaka swona.

⁶⁸ We HOSI, u ni vunene, naswona u endla leswinene, ndzi dyondzise milawu ya wena.

⁶⁹ Vasandzi va ndzi lumbeta, kasi mina ndzi hlayisa swiletelo swa wena hi mbilu ya mina hinkwayo;

⁷⁰ vanhu lava va tlanyele timbilu, kambe mina ndzi tsakela ngopfu nawu wa wena;

⁷¹ ku wela ekhombyeni swi ndzi pfunile, hikuva swi ndzi dyondzisile milawu ya wena.

⁷² Eka mina, nawu lowu humaka enon'weni wa wena wu ni nkoka ku tlula mali yo tala ya nsuku ni silivhere.

10

⁷³ We HOSI, u ndzi vumbile ni ku ndzi tiyisa hi mavoko ya wena, hikokwalaho ndzi nyike vutlhari, leswaku ndzi ta twisisa swileriso swa wena.

⁷⁴ Lava va ku chavaka, va ta tsaka loko va ndzi vona, hikuva ndzi tshemba rito ra wena.

⁷⁵ We HOSI, ndza swi tiva leswaku u boha timhaka hi ku lulama, hikokwalaho a wu hoxanga loko u ndzi tshikile ndzi xaniseka.

⁷⁶ Kambe sweswi rirhandzu ra wena a ri ndzi tiyise, hikuva u ndzi tshembisile sweswo mina nandza wa wena.

⁷⁷ Ndzi kombe tintswalo ta wena leswaku ndzi ta hanya, hikuva ndzi tsakela ngopfu nawu wa wena.

⁷⁸ Vasandzi vona a va khome hi tingana, hikuva va ndzi lumbetile, kambe mina a ndzi tshiki ku anakanya swiletelo swa wena.

⁷⁹ Hinkwavo lava va ku chavaka, a va te eka mina, leswaku ndzi va dyondzisa switsundzuxo swa wena.

⁸⁰ Ndzi navela ku landza milawu ya wena, ndzi nga yi tshiki, kutani a ndzi nga khomiwi hi tingana.

11

⁸¹ Ndzi navela ngopfu ku ponisiwa hi wena, hikuva ndzi tshemba leswi u swi vulaka.

⁸² Ndzi langutela hi mahlo-ngati ku hetiseka ka switshembiso swa wena, ndzi ri: “We HOSI, xana u ta ta rini u ta ndzi pfuna xana?”

⁸³ Hambileswi ndzi punyaleke kukota mbita exitikweni, ndzi nga ka ndzi nga rivali milawu ya wena.

⁸⁴ Xana mina nandza wa wena ndzi ta xanisiwa ku fikela rini, ni lava va ndzi xanisaka, vona u ta va avanyisa rini xana?

⁸⁵ Vasandzi lava va cela khele emahlweni ka mina; a va na mhaka ni nawu wa wena.

⁸⁶ Swileriso swa wena hinkwaswo swi tiyile, hambiswiritano va ndzi xanisa ni ku ndzi lumbeta. Ndzi pfune!

⁸⁷ Va lavile ku ndzi susa laha misaveni, kambe mina a ndzi tshikanga swiletelo swa wena.

⁸⁸ Leswi u ndzi rhandzaka, ponisa vutomi bya mina, kutani ndzi ta hlayisa switsundzuxo leswi u swi vulaka.

12

⁸⁹ We HOSI, rito ra wena ra tiyisiwa ematilweni hilaha ku nga heriki.

⁹⁰ Ku tshembeka ka wena a ku na ku hela, hi wena u tumbuluxeke misava, kutani yi tiyile.

⁹¹ Swilo swa ha yimise sweswo ni namuntlha hi ku landza leswi u swi boheke, kutani hinkwaswo swi tirhela wena.

⁹² Ndzi ponisiwile ekhombyeni leri a ndzi ri eka rona, hikuva a ndzi tsakela ngopfu nawu wa wena.

⁹³ Ndzi nga ka ndzi nga rivali swiletelo swa wena, hikuva u ndzi hanyisa ha swona.

⁹⁴ Ndzi wa wena, ndzi lamulele, hikuva ndzi ringetile ku landza swiletelo swa wena.

⁹⁵ Hambileswi lavo homboloka va lavaka ku ndzi dlaya, switsundzuxo swa wena ndzi nga ka ndzi nga swi rivali.

⁹⁶ Ndzi vonile leswaku swilo hinkwaswo leswo saseka swa hela, kambe swileriso swa wena swona swi nga ka swi nga heli.

13

⁹⁷ Nawu wa wena ndzi wu rhandza ngopfu, siku hinkwaro ndzi le ku wu anakanyeni.

⁹⁸ Swileriso swa wena swi ndzi nyika vutlhari lebyi tlulaka bya valala va mina, kutani ndza swi hlayisa minkarhi hinkwayo.

⁹⁹ Ndzi tlula vadyondzisi va mina hinkwavo hi ku twisisa timhaka, hikuva ndzi anakanya switsundzuxo swa wena.

¹⁰⁰ Ndzi tlharihile ku tlula ni vanhu lavakulu, hikuva ndzi hlayisa swiletelo swa wena.

¹⁰¹ A ndzi pfumeli ku famba etindleleni leto homboloka, hikuva ndzi rhandza ku hlayisa rito ra wena.

¹⁰² Swiboho swa wena a ndzi swi fularheli, hikuva hi wena u ndzi dyondziseke swona.

¹⁰³ Marito ya wena a hi ku nandziha ka wona, ma tsokombela ku tlula ni vulombe enon'weni wa mina.

¹⁰⁴ Swiletelo swa wena swa ndzi tlharihisa, hikokwalaho ndzi vengaka tindlela hinkwato ta mavunwa.

14

¹⁰⁵ Rito ra wena i rivoningo endleleni ya mina, ni ku vonakala emilengeni ya mina.

¹⁰⁶ Ndzi tiyisile hi ku hlambanya, leswaku swiboho swa wena leswo lulama, ndzi ta swi hlayisa.

¹⁰⁷ Ndzi le ku xanisekeni lokukulu! Ndzi hanyise we HOSI, hilaha u vuleke hakona.

¹⁰⁸ We HOSI, amukela xikhongelo xa mina xa ku nkhensa, kutani u ndzi dyondzisa leswi u swi boheke.

¹⁰⁹ Minkarhi hinkwayo ndzi le kusuhi ni ku dlawa, kambe a ndzi rivali nawu wa wena.

¹¹⁰ Lavo homboloka va ndzi rhiyile hi ntlhamu, kambe a ndzi tluli swiletelo swa wena.

¹¹¹ Switsundzuxo swa wena, ndza swi amukela minkarhi hinkwayo, hi swona swi ndzi tsakisaka.

¹¹² Ndzi navela ku landzelela milawu ya wena minkarhi hinkwayo ku kondza ndzi ya eku feni.

15

¹¹³ A ndzi twanani ni vakanganyisi, hikuva ndzi rhandza nawu wa wena.

¹¹⁴ Wena HOSI, u xisirhelelo ni xitlhangu xanga, ndzi tshemba rito ra wena.

¹¹⁵ N'wina mi endlaka leswo biha, hambanani na mina, ndzi ta kota ku hlayisa swileriso swa Xikwembu xanga.

¹¹⁶ Ndzi seketele hilaha u tshembiseke hakona, ndzi ta hanya, u nga ndzi tshiki empfhukeni hikuva ndzi tshembe wena.

¹¹⁷ Ndzi tiyise, leswaku ndzi ta pona, ndzi tikarhatela milawu ya wena minkarhi hinkwayo.

¹¹⁸ U fularhela hinkwavo lava tlangaka hi milawu ya wena; hakunene vukanganyisi bya vona byi xisa vona vinyi!

¹¹⁹ Lavo homboloka, eka wena i mavivi ntsena etikweni, hikokwalaho ndzi rhandza switsundzuxo swa wena.

¹²⁰ Ndza rhurhumela emahlweni ka wena hikuva ndza ku chava, ndzi chava ni leswi u swi boheke.

16

¹²¹ Ndzi endlile leswo lulama, leswi nga nawini, u nga ndzi nyiketi eka lava va ndzi xanisaka.

¹²² Tikombe eka mina, u ndzi katekisa, u nga pfumeli leswaku vasandzi va ndzi xanisa.

¹²³ Ndza ku langutela hi mahlo-ngati leswaku u ta ndzi lamulela, ni leswaku switshembiso swa wena leswo lulama swi ta hetiseka.

¹²⁴ Ndzi pfune mina nandza wa wena, hikuva wa ndzi rhandza. Ndzi dyondzise ni milawu ya wena!

¹²⁵ Ina, ndzi nandza wa wena, ndzi nyike vutlhari leswaku ndzi ta twisisa switsundzuxo swa wena.

¹²⁶ We HOSI, nkarhi wa wena wa ku tirha wu fikile, lwana ni lava tlulaka nawu wa wena.

¹²⁷ Mina ndzi rhandza swileriso swa wena ku tlula nsuku, hambi wu ri lowo saseka ngopfu.

¹²⁸ Hikokwalaho, swiletelo swa wena hinkwaswo hi swona swi ndzi kombaka ndlela leyinene; a ndzi twanani ni mikhuva ya vakanganyisi.

17

¹²⁹ Switsundzuxo swa wena swi tsakisa ngopfu, hikokwalaho ndzi swi hlayisa embilwini yanga.

¹³⁰ Loko vanhu va hlamuseriwa rito ra wena swi va pfula mahlo, vanhu va xiyimo xa le hansi swi va nyika vutlhari.

¹³¹ Ndzi tsakela ngopfu swileriso swa wena, ndzi swi amukela hi mandla mambirhi.

¹³² Ndzi langute, u ndzi twela vusiwana, hikuva u bohile makungu yo pfuna lava va ku rhandzaka.

¹³³ Switshembiso swa wena a swi ndzi kombe ndlela leyinene, ndzi nga tshuki ndzi fumiwa hi vudyoho.

¹³⁴ Ndzi lamulele eka vanhu lava va ndzi xanisaka, leswaku ndzi ta hlayisa swiletelo swa wena.

¹³⁵ Ndzi langute hi tintswalo hikuva ndzi nandza wa wena, u ndzi dyondzisa ni milawu ya wena.

¹³⁶ Mahlo ya mina ma tenga-tenga mihloti, hikuva vanhu a va hlayisi nawu wa wena.

18

¹³⁷ We HOSI, u lulamile, ni swiboho swa wena a hi ku lulama ka swona!

¹³⁸ Switsundzuxo swa wena, u hi nyikile swona hi ku lulama ni ku tshembeka lokukulu.

¹³⁹ Ndzi vaviseka ngopfu emoyeni, hikuva valala va mina a va na mhaka ni rito ra wena.

¹⁴⁰ Switshembiso swa wena swi tiyile swinene, kutani mina nandza wa wena ndza swi tsakela.

¹⁴¹ Hambileswi ndzi nga munhu ntsena ni vanhu va ndzi langutelaka ehansi, a ndzi rivali swiletelo swa wena.

¹⁴² Minkarhi hinkwayo ku lulama ka wena ku hetisekile, ni nawu wa wena a wu hundzuki.

¹⁴³ Hambiloko ndzi wela hi gome ni nhlomulo, ndzi tsakela swileriso swa wena.

¹⁴⁴ Switsundzuxo swa wena swi lulamile minkarhi hinkwayo; ndzi nyike vutlhari, ndzi ta hanya.

19

¹⁴⁵ We HOSI, ndzi huwelela eka wena hi mbilu ya mina hinkwayo! Ndzi hlamule, kutani ndzi ta hlayisa milawu ya wena.

¹⁴⁶ Ndzi huwelela eka wena! Ndzi ponise, kutani ndzi ta yingisa switsundzuxo swa wena.

¹⁴⁷ Ndzi pfuka nimpundzu swinene ndzi kombela ku pfuniwa, hikuva ndzi tshemba marito ya wena.

¹⁴⁸ Vusiku hinkwabyo vurhongo a byi khomi, hikuva ndzi le ku anakanyeni ka swileriso swa wena.

¹⁴⁹ We HOSI, ndzi yingise hi rirhandzu ra wena; leswi u swi boheke a swi sirhelele vutomi bya mina.

¹⁵⁰ Lava va ndzi xanisaka, va ndzi tshinelela va ri ni makungu layo biha, ni nawu wa wena a va na mhaka na wona.

¹⁵¹ Hambiswiritano we HOSI, u le kusuhi na mina, ni swileriso swa wena hinkwaswo swi tiyile.

¹⁵² Ndzi swi tivile khale leswaku switsundzuxo swa wena swi ta tirha minkarhi hinkwayo.

20

¹⁵³ Wa nga languta maxangu ya mina, u ndzi humesa ka wona, hikuva a ndzi rivali nawu wa wena.

¹⁵⁴ Kambisisa mhaka ya mina, u ndzi kutsula; ndzi hanyise hilaha u tshembiseke hakona.

¹⁵⁵ Lavo homboloka va le kule ni ku ponisiwa, hikuva a va yingisi milawu ya wena.

¹⁵⁶ We HOSI, tintswalo ta wena i tikulu, ndzi hanyise hi swiboho swa wena.

¹⁵⁷ Hambileswi vaxanisi ni valala va mina va nga tala, a ndzi hambani ni switsundzuxo swa wena.

¹⁵⁸ Loko ndzi vona lava nga pfumeriki, ndzi twa ku vava, hikuva a va na mhaka ni switshembiso swa wena.

¹⁵⁹ Vona hilaha ndzi tsakelaka swiletelo swa wena hakona; ndzi hanyise, hikuva wa ndzi rhandza.

¹⁶⁰ Mongo wa rito ra wena i ntiyiso; hinkwaswo leswi u swi boheke hi ku lulama ka wena, swi ta va kona minkarhi hinkwayo.

21

¹⁶¹ Varhangeri va tiko va ndzi xanisa ndzi nga onhanga nchumu, hambiswiritano embilwini ya mina, ndzi chava rito ra wena ntsena.

¹⁶² Ndzi tsakela switshembiso swa wena, ku fana ni munhu la kumaka rifuwo lero tala.

¹⁶³ Mavunwa ndza ma nyenya, a ndzi twanani na wona, kambe nawu wa wena wona ndza wu rhandza.

¹⁶⁴ Siku rin'wana ni rin'wana ndzi ku tlangela ka-7, hikwalaho ka leswi u swi boheke hi ku lulama ka wena.

¹⁶⁵ Lava rhandzaka nawu wa wena, va ni ku rhula lokukulu, ku hava lexi xi nga va khugulaka va wa.

¹⁶⁶ We HOSI, ndzi languta eka wena leswaku u ndzi ponisa, ndzi ri karhi ndzi landzelela swileriso swa wena.

¹⁶⁷ Ndzi hlayisa switsundzuxo swa wena embilwini ya mina, hikuva ndzi swi rhandza ngopfu.

¹⁶⁸ Ndzi hlayisa swiletelo ni switsundzuxo swa wena, mintirho ya mina hinkwayo wa yi tiva!

22

¹⁶⁹ We HOSI, amukela xirilo xa mina, u ndzi nyika vutlhari hilaha u vuleke hakona.

¹⁷⁰ Yingisa xikhongelo xa mina kutani u ndzi kutsula, hikuva u ndzi tshembisile swona.

¹⁷¹ Ndzi ta ku tlangela hi nomo wa mina, hikuva u ndzi dyondzisa milawu ya wena.

¹⁷² Ndzi ta yimbelela ndzi twarisa switshembiso swa wena, hikuva milawu ya wena hinkwayo yi lulamile.

¹⁷³ We HOSI, ndzi pfune minkarhi hinkwayo hikuva ndzi hlawurile ku landzelela swiletelo swa wena.

¹⁷⁴ We HOSI, ndzi navela ngopfu ku lamuleriwa hi wena. Nawu wa wena ndzi wu tsakela ngopfu.

¹⁷⁵ Ndzi tshike ndzi hanya, leswaku ndzi ta ku dzunisa; swiboho swa wena a swi ve swona swi ndzi pfunaka.

¹⁷⁶ Ndzi le ku pepetsekeni kukota nyimpfu leyi lahlekeke. Tana u ta ndzi lava mina nandza wa wena, hikuva a ndzi rivali swileriso swa wena.