Pisalema 118 - BIBELE Mahungu Lamanene

Xikhongelo xa munhu loyi a ponisiweke hi Xikwembu

¹ Tlangelani HOSI, hikuva yi ni vunene, rirhandzu ra yona a ri na ku hela.

² Vaisraele a va vule sweswo va ku: “Rirhandzu ra yona hi leri nga heriki.”

³ Va ka Aroni a va vule va ku: “Rirhandzu ra yona hi leri nga heriki.”

⁴ Lava chavaka HOSI, a va vule va ku: “Rirhandzu ra yona hi leri nga heriki.”

⁵ Loko ndzi ri khombyeni, ndzi huwelerile eka HOSI Xikwembu, kutani xi yingisile xikhongelo xa mina xi ndzi ntshunxa.

⁶ A ndzi chavi nchumu, hikuva HOSI Xikwembu xi na mina, xana munhu a nga ndzi endla yini xana?

⁷ HOSI Xikwembu xi yima na mina, xi ndzi nyika vapfuni, ndzi ta vona ku hluriwa ka lava va ndzi vengaka.

⁸ Ku tumbela eka HOSI Xikwembu, swi tlula ku tshemba munhu wa misava leyi.

⁹ Ku tumbela eka HOSI Xikwembu, swi tlula ku tshemba vanhu va swiyimo swa le henhla.

¹⁰ Vanhu hinkwavo va matiko a va ndzi rhendzerile, kambe hi vito ra HOSI, ndzi va hlurile.

¹¹ A va ndzi rhendzerile matlhelo hinkwawo, kambe ndzi va hlurile hi vito ra HOSI.

¹² Va ndzi hlengerile kukota tinyoxi, kambe va hatle va nyamalala, onge i ndzilo wa mavivi. Ndzi va hlurile hi vito ra HOSI.

¹³ A va lava ku ndzi wisela hansi va ndzi kandziyela, kambe HOSI Xikwembu xi ndzi lamulerile.

¹⁴ HOSI Xikwembu hi xona xi ndzi tiyiseke, xi ndzi lwela, ndzi ponisiwile hi xona.

¹⁵ Twanani huwa ya ntsako leyi humaka emintsongeni ya lavo lulama; va ri: “HOSI Xikwembu xi tirhile hi matimba ya xona,

¹⁶ HOSI Xikwembu xi hlurile, xi tirhile hi matimba ya xona!”

¹⁷ A ndzi nga fi, ndzi ta hanya leswaku ndzi twarisa mintirho ya HOSI Xikwembu.

¹⁸ Xi ndzi bile ngopfu, kambe a xi pfumelanga leswaku ndzi fa.

¹⁹ Ndzi pfuleleni tinyangwa ta lavo lulama, hikuva ndzi lava ku nghena ha tona eTempeleni, ndzi ya tlangela HOSI Xikwembu.

²⁰ Leyi hi yona nyangwa yo ya eka xona, lavo lulama va nghena ha yona!

²¹ We HOSI, ndza ku nkhensa, hikuva u ndzi hlamurile, u ndzi ponisa.

²² Ribye leri nyenyiweke hi vaaki, ri hundzukile ribye lerikulu ra yinhla.

²³ Swilo leswi swi endliwe hi HOSI, i mhaka leyi hlamarisaka loko hi yi languta.

²⁴ Leri i siku leri vekiweke hi HOSI, a hi tlangeleni, hi tiphina ha rona.

²⁵ We HOSI, ha ku kombela, hi ponise! Ha kombela we HOSI, hi katekise!

²⁶ A ku katekisiwe munhu la taka hi vito ra HOSI. Hi mi navelela minkateko hi ri eTempeleni ya yona.

²⁷ HOSI i Xikwembu, xa hi voninga. Endlani nkuvo mi longoloka mi khomile switluka, ku kondza mi ya fika etimhondzweni ta alitari.

²⁸ Xikwembu xa mina hi wena, ndzi ta ku tlangela, U Xikwembu xa mina, ndzi ta ku twarisa.

²⁹ Nkhensani HOSI, hikuva yi ni vunene, rirhandzu ra yona hi leri nga heriki.